समलिङ्गीको आशंकामा छोरालाई पिटेपछि आमालाई यस्तो सजाय

एजेन्सी, २५ जेठ । अमेरिकास्थित क्यालिफोर्निया राज्यको एउटा अदालतले एकजना महिलालाई आजीवन जेल सजाय र उनका प्रेमीलाई मृत्युदण्डको सजाय सुनाएको छ । ती दुईलाई महिलाको आठ वर्षीय छोरालाई समलिङ्गी भएको आशंकामा मरणासन्न हुने गरी यातना दिएको आरोपमा अदालतले सजाय सुनाएको हो ।

ती दुईले आठ वर्षीय गाब्रियल फर्नान्डेजलाई धेरैपटक पिटेका थिए, उनलाई बन्दी बनाएर भोको राखेका थिए । उनलाई बीबी गन प्रहार गर्नुका साथै एकपटक उनको दाँतमा क्रिकेट ब्याटले पनि प्रहार गरिएको थियो ।

बालकको शरीर जल्नुका साथै टाउकोमा चोट लागेको र उनको करङ पनि भाँचिएको पाइएको थियो ।गाब्रियलका ३४ वर्षीय आमा पर्ल फर्नान्डेजले फेब्रवरीमा आफ्नो छोराको हत्या प्रयासको अपराध स्वीकार गरेकी छिन् । न्यायिक जूरीहरुले ३७ वर्षीय इशाउरो एग्युरीलाई पनि हत्या प्रयासको अपराधमा दोषी पाएको हो ।