मन्त्रीपरिषद् बैठकको निर्णय: नेपाल प्रहरीमा अब ३ जना मात्रै एआईजी

काठमाडौँ। नेपाल प्रहरीमा तीन जना मात्रै एआईजी रहने भएका छन्। आईतबार बसेको मन्त्रीपरिषद् बैठकले नेपाल प्रहरीमा तीन जना मात्रै एआईजी रहने गरी दरबन्दी कायम गरेको हो यस अघि १५ जना एआइजी रहँदै आएकोमा मन्त्रीपरिषद बैठकले अब ३ जनाको मात्रै दरबन्दी कायम गर्ने गरेको सरकारका प्रवक्ता एवम् संचार तथा सूचना प्रविधि मन्त्री गोकुल बास्कोटाले जानकारी दिए।

त्यसैगरी सशष्त्र प्रहरीमा पनि एआईजीको दरबन्दी २ जना कायम गरिएको छ। बैठकले स्थानीय तहमा आवश्यक पर्ने जनशक्तिको पदपूर्तिलाई पहिलो प्राथमिकता दिई आगामी आर्थिक वर्ष भित्र १६ सय दरबन्दी र बाँकि दरबन्दी क्रमशः पदपूति गर्ने गृह मन्त्रालयको प्रस्तावित ३ हजार १ सय १ दरबन्दी पनि स्विकृत गरिएको सरकारका प्रवक्ता बास्कोटाले बताए।

सरकारले तातोपानीस्थित मितेरी पुल र रसुवागढी–स्याफ्रूबेँसी र चीनको ज्याङबु जोड्ने पुल बनाउने चीन सरकारको प्रस्ताव पनि स्विकृत गरेको छ। दुवै पुल चीन सरकारको आर्थिक तथा प्राविधिक सहयोगमा निर्माण हुनेछ। त्यसैगरी नेपाल र चीन सरकारबीच उर्जा क्षेत्रमा सहकार्य गर्नका लागि आवश्यक समझदारी गर्ने अख्तियारी उर्जा, जलस्रोत तथा सिँचाई मन्त्रीलाई दिने निर्णय पनि गरिएको सरकारका प्रवक्ता बास्कोताले जानकारी दिए।चीनको नेश्नल इनर्जी अफ एडमिनिष्ट्रेशनले नेपालको उर्जा, जलस्रोत तथा सिंचाई मन्त्रालयसँग उर्जा क्षेत्रमा सहकार्यका लागि समझदारी गर्ने प्रस्ताव अघि सारेको थियो। सोही प्रस्तावमा समझदारी गर्ने अख्तियारी मन्त्रीपरिषद बैठकले उर्जा, जलस्रोत तथा सिंचाई मन्त्री वर्षमान पुनलाई दिएको हो।