कुवेतस्थित नेपाली दूतावासमा नयाँ प्रथम सचिव र श्रम सहचारीको आगमन

नेपाली राजदूतावास कुवेतमा नयाँ प्रथम सचिव चण्डिका पोखरेल र श्रम सहचारी जनार्दन गौतमले काम सुरु गरेका छन्। दुवै जना आइसकेपछि दूतावासको सेवा अझ व्यवस्थित र सहज हुने अपेक्षा प्रवासी नेपालीमा देखिएको छ।

प्रथम सचिव चण्डिका पोखरेल परराष्ट्र सेवामै अनुभवी मानिन्छन्। स्विट्जरल्यान्डमा चार वर्षको डिप्लोम्याटिक सेवा पूरा गरेपछि कुवेत उनको दोस्रो विदेश मिशन हो। उनी ४ अक्टोबरमा कुवेत आइपुगेकी हुन्। प्रशासनिक काम, कूटनीतिक समन्वय र दूतावासको दैनिक प्रक्रियालाई व्यवस्थित बनाउन उनको अनुभवले राम्रो प्रभाव पार्ने विश्वास समुदायले राखेको छ।

श्रम सहचारी जनार्दन गौतम श्रम मन्त्रालयमा पाँच वर्षको अनुभव बोकेर कुवेत आएका हुन्। सुरुमै श्रमिकको पक्षमा स्पष्ट ढंगले काम गर्ने अपेक्षा गरिएको छ, किनकि यहाँ डेलिभरी ड्राइभर, सफाई क्षेत्र र घरेलु कामदारसँग सम्बन्धित समस्या दिनदिनै बढिरहेका छन्। निवर्तमान श्रम सहचारी गिरि प्रसाद आचार्यको कार्यकाल सकिएसँगै गौतमले नयाँ जिम्मेवारी सम्हालेका हुन्। श्रमिकका कानुनी प्रक्रिया, समस्या समाधान र मार्गदर्शनमा उनको भूमिका महत्वपूर्ण हुने विश्वास गरिएको छ।

दूतावासमा आएका यी दुई अधिकारीको संयोजनले नेपाली समुदाय, श्रमिक र सेवा खोज्नेहरूलाई अझै छिटो, सरल र भरपर्दो सेवा मिल्ने आशा कुवेतका प्रवासीहरूले व्यक्त गरेका छन्।