समाचार छापिएपछि म्यानपावरले फिर्ता गर्यो १ लाख

कास्की – पोखराको ग्लोबल इन्टरनेशनल म्यानपावरले कतार पठाउने भन्दै एक व्यक्तिबाट लिएको एक लाख रुपैयाँ फिर्ता गरेको छ ।कतार पठाइदिने भन्दै पैसा लिएको ६ महिनासम्म पनि नपठाएपछि तनहुँको प्युरीदोभानका देउबहादुर श्रेष्ठले जिल्ला विकास समिती कास्कीले सञ्चालन गरेको सूचना केन्द्रमा निवेदन दिनुभएको थियो ।

श्रेष्ठका विषयमा स्थानीय पत्रिकामा खबर छापिएपछि म्यानपावरले एक लाख रुपैयाँ फिर्ता दिएको हो । शुक्रबार जिल्ला समन्वय अधिकारी डिल्लीराम सिग्देल र जिल्ला समन्वय समितिका सदस्य तोरणबहादुर बानियाँको रोहबरमा श्रेष्ठलाई पैसा फिर्ता गरिएको केन्द्रले जनाएको छ ।

श्रेष्ठले पत्रकार र पत्रिकाका कारण आफूले पैसा फिर्ता पाएको भन्दै खुशी व्यक्त गर्नुभयो । उहाँले बाँकी ६० हजार रुपैयाँ र पासपोर्ट पनि छिट्टै फिर्ता पाउनेमा आशावादी रहेको बताउनुभएको छ ।