बालक अपहरण गर्न खोज्दा स्थानीय भेटे, पक्राउ गरेर प्रहरीलाई बुझाए

कपिलवस्तु । कपिलवस्तुमा २ वर्षीय बालक अपहरण गर्न खोजेको आरोपमा स्थानीयले एक जनालाई पक्राउ गरेर प्रहरीलाई बुझाएका छन्। कपिलवस्तुको बुद्धभूमि नगरपालिका वडा नं १० गगनी गाउँमा मध्य रातमा २ वर्षीय बालक अपरहण गर्न खोजेको भन्दै स्थानीयले एक जनालाई पक्राउ गरेर प्रहरीमा बुझाएका हुन्।

पक्राउ पर्नेमा रामग्राम नगरपालिका वडा नम्बर १ नवलपरासीका सुवास हरिजन रहेका छन्। स्थानीय राम औतार पासीका २ वर्षीय छोरालाई गाउँबाट जबरजस्ती बोकेर जैजाँदै गर्दा स्थानीयले देखेपछि उनलाई नियन्त्रणमा लिएका हुन्। नियन्त्रणमा लिएर स्थानीयले बाँधेर राखी प्रहरीलाई खबर गरेका थिए।स्थानीयको खबर पछि उक्त स्थान पुगेको प्रहरीले हरिजनलाई नियन्त्रणमा लिएर थप अनुसन्धान गरिरहेको जिल्ला प्रहरी कार्यालय कपिलबस्तुले जनाएको छ।