लुटिए भन्दै प्रहरीलाई सूचना दिने व्यक्ति नै एक किलो सुनसहित पक्राउ

काठमाडौं, १० साउन । एक किलो सुन हात पार्न आफू लुटिएको नाटक गरेर खबर गर्ने खड्गबहादुर सुनुवारसहित सहयोगी ५ जनालार्इ पक्राउ गरेको छ । नाटकी शैलीमा लुटिएको बताउने उनीहरु गोंगबुबाट पक्राउ परेका हुन् ।

नाटकी शैली यस्तो थियो

राजधानीको गोंगबुस्थित राप्ती पाहुनाघरबाट नेपाल प्रहरीको हटलाइन नम्बर ‘१००’मा बुधबार राती एउटा महत्वपूर्ण सूचना आयो, ‘तीनजना डाँकाहरुले सुनचाँदी व्यवसायीको एक किलो सुन लुटेर भागे ।’ संवेदनशील सूचना पछ्याउँदै महानगरीय प्रहरी परिसर काठमाडौंका प्रमुख ‘एसएसपी’ विश्वराज पोखरेल घटनास्थलतर्फ लागे । राप्ती पाहुनाघरबाट सुन लुटिएको सूचना दिने व्यक्ति थिए, दाङका खड्ग प्रसाद सुनुवार । सुनचाँदी व्यवसायी संघ दाङबाट ६० भन्दा बढी सुनचाँदी व्यवसायीको पैसा लिएर सुन किन्न काठमाडौं आएका सुनुवारले बुधवार न्युरोडस्थित सिद्धार्थ बैंकबाट सुन खरिद गरेका थिए ।

बैंकबाट खरिद गरिएको सुन लिएर पाहुनाघरमा पुगेपछि उनले प्रहरीलाई खबर गरेका थिए । ‘अनुसन्धान गर्दै जाँदा प्रहरीलाई गलत सूचना दिएको खुल्न आएको छ,’ काठमाडौं प्रहरी प्रमुख पोखरेलले भने, ‘बिजी मल स्थित एक सुन पसलेलाई खड्गप्रसाद सुनुवारले सुन राख्न दिएको खुल्न आएको छ ।’प्रहरीले बिजी मलमा राखिएको उक्त सुन सहित खड्ग सुनुवार, उनको ज्वाई नाता पर्ने वचन सुनुवार लगायत पाँच जनालाई नियन्त्रणमा लिएको छ । पक्राउ परेकाहरुलाई ठगी मुद्दा चलाउने तयारी गरिएको बताइएको छ ।