दुई वर्षीया भतिजीसहित दाईको परिवारै सखाप पार्ने भाइ पक्राउ

सप्तरी, साउन । नागरिकतासम्बन्धी विवादका कारण दुई वर्षीया भतिजीसहित दाईको परिवारै सखाप पार्ने भाईलाई प्रहरीले पक्राउ गरेको छ । सप्तरीको राजविराज–१५ मुसहरनियाँमा डेढ महिना अगाडि हत्या गरी सेफ्टीट्याकी फालिएको बेचनीदेवी साहको शवलाई प्रहरीले फेला पारेको छ । उनीसँगै बेपता भएका उनका पति सूर्यनारायण साह र छोरी प्रतिभालाई समेत उनका देवर पञ्चदेव साहले हत्या गरेको खुलेको छ ।

जिल्ला प्रहरी कार्यालय सप्तरीमा आज पत्रकार सम्मेलनको आयोजना गरी हत्यारा पञ्चदेव साहलाई सार्वजनिक गरिएको छ । उनले दाइ सूर्यनारायण, गर्भवती भाउजू बेचनीदेवी र दुई वर्षीय भतिजीको घाँटी थिचेर हत्या गरी नगरमा गाडेको प्रहरी अनुसन्धानबाट खुलेको छ । सूर्यनारायण र भाउलाई रक्सी खुवाएर उनीहरुको हत्या गरेका प्रहरी उपरीक्षक मुकेशकुमार सिंहले बताए ।बेचनीदेवीको परिवारको हत्या गरी राजविराज नगरक्षेत्रमा गाडेको अनुसन्धानबाट खुलेको प्रहरी उपरीक्षक सिंहले बताए ।

नागरिकताको विषय र पुरानो रिसइबीका कारण देवर पञ्चदेव साह र छोरा धर्मेन्द्र साह तथा स्थानीय जिवछ साहसहितले उनीहरुको हत्या गरी बोरामा हालेर नहरमा गाडेका थिए ।साउन ७ गते पक्राउ परेका हत्यामा संग्लगन रहेका प्रतिवादी पञ्चदेव, धर्मेन्द्र र थापा भनिने जिवछ साहबाट अनुसन्धानका क्रममा हत्या गरेको खुल्न आएको हो । प्रतिवादीहरूलाई कर्तव्य ज्यान मुद्दा दर्ता गरी अदालतवाट म्याद थप गरी अनुसन्धान कार्यसमेत थालिएको सप्तरी प्रहरी प्रमुख सिंहले बताए ।