काङ्ग्रेसका जिल्ला सभापति तथा पूर्व सांसद पंगेनीको हृदयघातबाट निधन

विजय नेपाल

पोखरा । नेपाली काँग्रेस स्याङ्जाका जिल्ला सभापति एवं पूर्व सभासद् कमल पंगेनीको मृत्यु भएको छ। गएराति हृदयघात भएपछि कालिका सामुदायिक अस्पताल, भीरकोट वडा नं. १, हेलुमा उपचारार्थ लगिएकोमा उनलाई मृत घोषणा गरिएको थियो । उनी ५५ वर्षका थिए।

पंगेनी संविधानसभा निर्वाचन २०७० मा स्याङ्जा क्षेत्र नम्बर २ बाट विजयी भएका थिए । उनले तत्कालीन नेकपा एमालेका कृष्ण खाँणलाई हराएका थिए ।
उनी २०६४ सालको संविधानसभामा हितकाजी गुरुङसँग पराजित भएका थिए । त्यस्तै प्रदेशसभा निर्वाचन २०७४ मा स्याङ्जा क्षेत्र (क) मा दीपक चर्तिमगरसँग पनि पराजित हुन पुगेका थिए ।

नेपाली काँग्रेस जिल्लाको पार्टी सभापतिमा उनको यो तेस्रो कार्यकाल थियो । भीरकोट वडा नं. ६ का स्थायी बासिन्दा कमल पंगेनीका श्रीमती, १ छोरा र १ छोरी छन् ।