एसिया कप छनोट क्रिकेट : युएईद्वारा नेपालसामु २५५ रनको लक्ष्य प्रस्तुत

काठमाडौं, १४ भदौं । मलेसियामा जारी एसिया कप छनोट क्रिकेट प्रतियोगिताको दोस्रो खेलमा युएईले नेपालसामु २५५ रनको लक्ष्य पेश गरेको छ । मलेसियाको राजधानी क्वालालम्पुरस्थित किनरारा ओभलमा टस हारेर पहिले ब्याटिङ गरेको युएईले निर्धारित ५० ओभरमा ९ विकेट गुमाउँदै २५४ रन जोड्न सफल भएको हो ।युएईका लागि ओपनर चिराग सुरीले सर्वाधिक ६५ रनको योगदान दिए । यस्तै अदनान मुफ्तीले नटआउट ५७ रन बनाए भने असफक अहमेदले ४५, रामिज साहजादले ३५ रन बनाए ।

नेपालका लागि युवा लेग स्पिनर सन्दीप लामिछानेले सर्वाधिक ४ विकेट लिए । १० ओभर बलिङ गरेका सन्दीपले २४ रन मात्रै खर्चिए । यस्तै सोमपाल कामी र वसन्त रेग्मीले समान दुई दुई विकेट लिए । आजको खेलमा करण केसी महंगा सावित भए । ८ ओभर बलिङ गरेका करणले ६१ रन खर्चिए ।नेपाल र युएई एक दिवसीय मान्यता प्राप्त देश हुन् । एशिया कप छनौटमा नेपाल हिजो पहिलो खेलमा ओमानसंग ७ विकेटले पराजित भएको थियो । त्यसकारण पनि नेपाल आजको खेल जित्नैपर्ने दवाबमा छ ।