कराेड रुपैयाँभन्दा बढीकाे यार्सा गुम्बासहित एकजना पक्राउ

बाँक – नेपालगञ्ज विमानस्थलबाट प्रहरीले ठूलो परिमाणको यार्सा गुम्बासहित एकजनालाई नियन्त्रणमा लिएको छ । डोल्पाबाट समिट विमानमा नेपालगञ्ज अवतरण गरेका डोल्पा ठूलो भेरी नगरपालिका–६, का श्रवणकुमार बुढालाई ६ किलो एकसय ग्राम यार्सा सहित पक्राउ गरिएको जिल्ला प्रहरी कार्यालय बाँकेका एसपी अरुण पौडेलले जानकारी दिनुभयो ।

बुढाले अबैध यार्सागुम्बा ल्याएको भन्ने सूचनाको आधारमा पक्राउ परेका बुढाको साथबाट डिजिटल तराजुसमेत बरामद गरिएको छ । पक्राउ गरिएका बुढालाई यार्सा गुम्बासहित जिल्ला वन कार्यालय बाँकेमा बुझाइएको छ । जिल्ला वन कार्यालय बाँकेले वन मुद्धामा अनुसन्धान भइरहेको जनाएको छ । बरामद गरिएको यार्सागुम्बाको बजार मूल्य करिब सवा करोड रहेको प्रहरीले जनाएको छ ।