संकटमा सलमान खान

एजेन्सी । बलिउड अभिनेता सलमान खान संकटमा फसेका छन् । बिहारको मुज्जफुर अदालतले उनको फिल्म लवरात्रीका विरुद्ध परेको एक निवेदनमाथि प्रारम्भीक कारबाही गर्न प्रहरीलाई आदेश दिएको छ ।सलमान खानसहित अन्य ७ जना कलाकारमाथि कानुनी कारबाही हुन लागेको हो । लवरात्री फिल्म आगामी अक्टुबर ५ मा दुर्गापूजाका दिन रिलिज हुँदैछ । बिहारका एक जना वलिक सुधीर ओझाले सो फिल्मले हिन्दुको भावनामा ठेस पुर्याएको भन्दै अदालतमा एक निवेदन दिएका थिए ।

अदालतले सो निवेदनमाथि शुरु कारबाही गर्दै आवश्यक छानविन गर्न प्रहरीलाई आदेश दिएको भारतीय सञ्चारमाध्यमले जनाएका छन् ।
सलमान खान र उनका भिनाजु मिलेर सो फिल्म बनाइरहेका छन् । फिल्म प्रेममा केन्द्रित भए पनि नवरात्रिलाई विगारेर लवरात्रि बनाइएको भन्दै केही हिन्दुवासी संगठनले यसअघि पनि सलमान खानको विरोध गरेका थिए । एक संगठनका प्रमुखले त सलमान खानलाई मारे २ लाख रुपैयाँ पुरस्कार दिनेसमेत घोषणा गरेका थिए । फिल्म विवादमा फसेपछि सलमान खान पनि तनावमा परेको बताइएको छ । बलिउडका सबैभन्दा सफल अभिनेता सलमान विभिन्न सयममा कानुनी संकटमा पर्दै आएका छन् । उनी कालो हिरण मारेको आरोपमा धेरै पटक अदालतमासमेत पुग्नु परेको छ । यद्यपी सो आरोपबाट उनी मुक्त भएका छन् ।