आजबाट एसिया कप क्रिकेट सुरु

काठमाडौं, ३० भदौ । एसिया कप क्रिकेट आजबाट संयुक्त अरब इमिरेट्स युएईमा सुरु हुँदैछ । एकदिवसीय फरम्याटको एसिया कपमा एसियाका ६ टेष्ट राष्ट्र र एक एसोसियट राष्ट्रले प्रतिस्पर्धा गर्ने छन् ।

एसिया कपको उद्घाटन खेलमा समूह ‘बि’ मा रहेका टेष्ट राष्ट्र बंगलादेश र श्रीलंकाले प्रतिस्पर्धा गर्ने छन् । उद्घाटन खेल नेपाली समय अनुसार आज साँझ ५ः१५ बजे दुबईमा सुरु हुनेछ । दुवै टोली सुखद सुरुवात गर्ने लक्ष्यसहित मैदान उत्रनेछन् ।

बंगलादेश माश्रफ मोर्टाजाको कप्तानीमा मैदान उत्रनेछन् । यस्तै श्रीलंकाको कप्तानी एन्जेलो म्याथ्युजले गर्नेछन् । एसिया कपको समूह ‘बि’ मा बंगलादेश र श्रीलंकासंगै अफगानिस्तान पनि रहेका छन् । समूह ‘ए’ मा भारत, पाकिस्तान र हङकङ रहेको छ ।हङकङ एसिया कप खेल्ने एकमात्र एसोसियट राष्ट्र हो । नेपाल भने एसिया कपको छनोटको शीर्ष दुईमा पर्न असफल भएको थियो ।