निको हुँदै नेयमार र एमबाप्पे, बढ्यो लिभरपुलविरुद्ध खेल्ने सम्भावना

पेरिस, ८ मंसिर । फ्रान्सेली क्लब पेरिस सेन्ट जर्मेन (पीएसजी) का फरवार्डद्वय नेयमार र किलियन एमबाप्पेको स्वास्थ्यमा सुधार भएको छ । अन्तर्राष्ट्रिय मैत्रीपूर्ण खेल दौरान चोट बोकेका उनीहरुले लिभरपुलविरुद्धको च्याम्यिनस लिग खेल्ने प्रबल सम्भावना बढेको छ ।पीएसजीका प्रशिक्षक थोमस टुचेलका अनुसार उनीहरुले शनिबार टोलुसोविरुद्धको लिग वान खेल्ने मौका गुमाए पनि लिभरपुलविरुद्ध खेल्ने सम्भावना भने रहेको छ । उनले शनिबार नै खेलाएर जोखिम नमोल्ने बताए ।

उनले अगाडि भने, ‘उनीहरु बुधबार राति लिभरपुलविरुद्धको खेलमा उपलब्ध हुने प्रबल सम्भावना छ ।’ब्राजिलले क्यामरुनलाई १–० ले पराजित गरेको खेलमा नेयमार घाइते भएका थिए । उनको तिघ्रामा खेलको आठौं मिनेटमै चोट लागेको थियो । त्यसैगरी, एमबाप्पेलाई उरुग्वेलाई १–० ले पराजित गरेको खेलमा काँधमा चोट लागेको थियो ।

बुधबार राती च्याम्पियन्स लिगको खेलअन्तर्गत घरेलु मैदानमा पीएसजीले लिभरपुलसँग खेल्दैछ । समूह ‘सी’ बाट नकआउट चरणमा प्रवेश गर्न दुवै टिम जित्नै पर्ने दबावमा छन् ।