लोरेन्टेको ह्याट्रिकसँगै ट्रानमेरको पोष्टमा टोटेनहमको गोल वर्षा

एजेन्सी, २१ पुस । एफए कपको तेस्रो चरणमा टोटेनहमले दोस्रो श्रेणीको ट्रानमेर रोभर्समाथि गोलको वर्षा गरेको छ । ट्रानमेरविरुद्ध ७ गोल गर्दै प्रिमियर लिग क्लब टोटेनहम हस्टपर एफए कपको चौथो चरणमा प्रवेश गरेको छ ।

ट्रानमेरको घरेलु मैदानमा भएको खेलमा टोटेनहमको फराकिलो जितमा फर्नान्डो लोरेन्टेले ह्याट्रिक गरे भने सर्ज औरियरले २ गोल गरे । गोलको वर्षा गर्नेक्रममा ह्युङ मिन सन र ह्यारी केनले समान १ गोल गरे ।

टोटेनहमले ४०औं मिनेटमा सर्ज औरियरको गोलबाट पहिलो हाफमा १–० को अग्रता बनाए पनि दोस्रो हाफमा गोलको वर्षा नै गरेको हो । फर्नान्डो लोरेन्टेले ४८औं मिनेटमा अर्को गोल थपे ।

औरियरले ५५औं मिनेटमा गोल थपेलगत्तै दुई मिनेटपछि नै ह्युङ मिन सनले गोल थपेपछि टोटेनहम ४–० को फराकिलो अन्तर बनायो । त्यसैगरी, ७१औं र ७२औं मिनेटमा लोरेन्टेले लगातार गोल गर्दै खेलमा आफ्नो ह्याट्रिक पूरा गरे । ८२औं मिनेटमा ह्यारी केनले अर्को गोल गरेपछि टोटेनहमले ७–० को शानदार जित निकाल्यो ।