युनाइटेड विरुद्ध जित निकाल्यो पिएसजीले (भिडियो सहित)

झापा । युरोपको सबैभन्दा ठूलो प्रतियोगिता च्याम्पियन्स लिगमा फ्रान्सेली क्लब पेरिस सेन्ट जर्मेन (पिएसजी) ले जित दर्ता गरेको छ । बुधबार बिहान भएको खेलमा पिएसजीले उपाधिको दाबेदार मानिएको टोली इगंल्यान्डको क्लब म्यानचेष्टर युनाइटेडलाई २–१ गोल अन्तरले हराएको हो ।

अन्तिम १६ को पहिलो लेगअन्तर्गतको खेलमा स्टार खेलाडीद्वय नेयमार र इडिन्सन काभानी बिनै मैदान उत्रिएको पिएसजीले युनाइटेडलाई हराएको हो । युनाइटेडको घरेलु मैदानमा भएको सो खेलमा पिएसजीलाई जित दिलाउन युवा खेलाडी किलियन एम्बाप्पे र क्रिस्नेल किम्पेम्बेले समान एक–एक गोल गरे ।

पहिलो हाफ गोलरहित बराबरी खेलेको पिएसजीले दोस्रो हाफमा दुई गोल गर्दै जित निकाल्यो । खेलको ५३ औं मिनेटमा आफुले पाएको कर्नरलाई राम्रोसँग सदुपयोग गर्दै पी केम्पेम्बेले टोलीलाई १-० को अग्रता दिलाएका थिए । यस्तै खेलको ६० औं मिनेटमा डि मारियाको पासमा केलिन एम्बाप्पेले उत्कृष्ट गोल गर्दै आफ्नो टोलीलाई २-०को अग्रता दिलाए ।

आफ्नै घरेलु मैदानमा निकै दवाबमा रहेको युनाइटेडले सोचेभन्दा फितलो प्रदर्शन गरेको थियो । पहिलो हाफमै उसका स्टार खेलाडी जेसे लिंगार्ड घाइते भएका थिए । उनलाई प्रतिस्थापन गर्दै चिलियन सुपरस्टार एलेक्सिस सान्चेज मैदान प्रवेश गरेका थिए । दोस्रो हाफमा एन्थोनी मर्सियालको ठाउँमा जुआन माटा मैदान छिरेपनि टिमलाई जित दिलाउँन सकेनन्। पिएसजीले भने कुनैपनि खेलाडी परिवर्तन गरेन ।

युनाइटेडका पल पोग्बा ८९ औं मिनेटमा रातो कार्ड खाँदै मैदान बाहिरिएका थिए । उनले २६ औं मिनेटमा पहिलो पहेलो कार्ड खाएका थिए । च्याम्पियन्स लिगको राउण्ड अफ १६ अन्तर्गत भएको खेलको पहिलो लिगमा युनाइटेडविरुद्ध जित निकाल्दै पिएसजीले अर्को चरणमा जाने आफ्नो सम्भावनालाई प्रवल बनाएको छ भने लिगको अर्को खेलमा आफ्ना निकै मत्वपुर्ण खेलाडीबिनानै मैदान उत्रिनुपर्ने बाध्यता युनाइटेडलाई रहने छ ।

यी दुईबीच लिगको दोस्रो खेल ७ मार्चमा पिएसजीको घरेलु मैदानमा हुनेछ ।