नेपाली कुकुर जसले ७ हजार मिटर अग्लो हिमाल बिनासुरक्षा सामग्री सफलतापूर्वक चढ्यो

एउटा सामान्य नेपाली कुकुरले आफ्नै बलबुतामा सात हजार मिटर उचाइको वरुणत्से हिमालको सफलतापूर्वक आरोहण गरेको छ । ‘मेरा’ नाम गरेको यो नेपाली कुकुर सफलतापूर्वक चुचुरोमा पुग्न सफल भएको हो ।

बरुणत्से हिमालको सफलतापूर्वक आरोहण गरेपछि अहिले ‘मेरा’को नाम फेरेर ‘बरु’ राखिएको छ । बरुले हिमाल ओरोहीका साथमा रहेर नयाँ विश्वरेकर्ड राख्न सफल भएको हो ।

वरुणत्से नजिकैबाट आरोहीहरूको पछि लागेको यो कुकुर बिनासुरक्षा सामग्री चुचुरोसम्म पुगेको आरोहीहरूले बताएका छन् ।

वरूणत्से आरोहण गर्न आएका विदेशी पर्यटकमध्ये डन वार्गोस्गीले उक्त कुकुरबारे ब्लग लेखेपछि यो खबर सार्वजनिक भएको हो । बरुबारे अन्तर्राष्ट्रिय मिडियाले विशेष स्थान दिँदै समाचार बनाएका छन् ।

अमेरिकाको सियाटलका डनका अनुसार मेरालाई बाटोमा आवश्यक ठाउँमा जीप लाइन लगाउनुबाहेक अरू कुनै सहयोग गर्नुपरेन । ऊ आफ्नै बलबुतामा चुचुरोसम्म पुगेको डनले लेखेका छन् । मेरापिक आसपास भेटिएकाले आरोहीहरूले नै ‘मेरा’ नाम राखिदिएका थिए ।

डनले विभिन्न सञ्चारमाध्यमलाई दिएको जानकारीअनुसार पोथी कुकुर मेरा तिब्बत र नेपालकै हिमाली भेगमा भेडाको सुरक्षा गर्ने हिमाली जातको हो । बिना सहायता हिमाल चढ्ने मिरा संम्भवत पहिलो कुकुर भएको दाबी गरिएको छ ।