इंग्लिस प्रिमियर लिग : आज ७ खेल हुँदै, म्यानचेस्टर युनाइटेडकाे खेलमा सबैकाे नजर

इंग्लिस प्रिमियर लिग फुटबलमा आज राति ७ वटा खेल हुने भएका छन् ।नेपाली समय अुनसार साँझ सवा ६ बजे म्यानचेस्टर सिटी र फुलह्याम भिड्दै छन् । दोस्रो स्थानमा रहेको सिटी आजको खेलमा विजयी भए लिभरपुललाई १ अंकले पछि पार्दै शीर्ष स्थानमा उक्लने छ ।

३१ खेलबाट लिभरपुलले ७६अंक जोडेको छ भने एक खेल कम खेलेको सिटीको ७४ अंक रहेको छ । फुलह्याम भने रेलिगेशन जोनमा रहेको छ ।

यस्तै आजै राति पानै नौ बजे ५ वटा खेल हुने छन् । ब्राइटन र साउथह्याम्प्टन, बर्नले र उल्भर ह्याम्पटन, क्रिष्टल प्यालेस र हड्ल्स फिल्ड, लेस्टर र बर्नमाउथ तथा म्यानचेस्टर युनाइटेड र वार्टफोर्ड भिडने छन् ।राति सवा १० बजे वेस्टह्याम र एभर्टनको खेल हुने छ । 

आजको खेलमा म्यानचेस्टर युनाइटेड विजयी भए आर्सनललाई पछि पार्दै चौथो स्थानमा उक्लने छ । म्यानचेस्टरले ओले गुनर सोल्सायरलाई स्थायी प्रशिक्षक नियुक्त गरेपछि पहिलो खेल खेल्दै छ ।

अन्तरिम प्रशिक्षक भएयता उत्कृष्ट प्रदर्शन गरेको म्यानचेस्टरले आजको खेलमा कस्तो प्रदर्शन गर्ला सबैले चासोको साथ हेरेका छन् ।

स्थायी प्रशिक्षक नियुक्त भएकै भोलिपल्ट सोल्सायरले खेलाडीहरुले कडा मेहनत गर्नु पर्ने अभिव्यक्ति दिएका कारण पनि आजको खेलको प्रतिक्षा धेरैले गरेका छन् ।