नेपाली युवकको नेपालमै भइरहेको विवाह दिल्ली महिला आयोगले रोकिदियो

काठमाडौं। दिल्ली महिला आयोगले एक नेपालीको विवाह रोकेको छ । उनको बैशाख १३ गतेको विवाह रोकिएको हो । भारतमा पहिलो विवाह गरेका ती नेपालीले नेपाल आएर फेरि विवाह गर्दै थिए । उता उनले पहिलो विवाह गरेकी भारतीय श्रीमतीले दिल्ली महिला आयोगमा उजुरी दिएपछि आयोगले उनको विवाह रोकेको हो ।

टाइम्स अफ इन्डियाका अनुसार नेपालका आकाशसँग मञ्जुले ६ वर्ष अघि विवाह गरेकी थिइन् । दुईवर्ष अघि उनले छोरी जन्माएपछि आकाशले छोडेको मञ्जुले महिला आयोगमा दर्ता गरेको उजुरीमा बताइन् । उजुरीमा बताए अनुसार आकाशको परिवारले उनलाई विवाह गरेलगत्तै दाइजोका लागि प्रताडित गर्ने गर्दथ्यो । उनको दाबी अनुसार उनी गर्भवती भएपछि आकाशको परिवारले उनलाई घरबाट बाहिर निकालेर माइती बस्न जान आदेश दिएका थिए ।

जब उनले छोरी जन्माइन् तब उनको परिवारले उनीसँगको सम्पर्क टुटाएको उनले बताइन् । उनी छोरीसँग नेपाल फर्किइन् तर आकाशको परिवारले पुनः दाइजोको कुरा निकालेर प्रताडित गरेको मञ्जुले दाबी गरिन् । उनले श्रीमानसँग कुरा सल्टाउन खोजिन् तर उनले पनि उनलाई घर निकाला गरेको मञ्जुले बताइन् । आकाशले आफूसँग सम्बन्धविच्छेद पनि नगरेको र छोरी र आफ्ना लागि खर्च गर्ने पैसा पनि नदिएको बताइन् । केही दिन अघि आकाशले दोस्रो विवाह गर्न लागेको खबर पाएपछि उनले दिल्ली महिला आयोग गुहारिन् ।

दिल्ली महिला आयोगकी सदस्य प्रोमिला गुप्ताले नेपालमा महिला अधिकारमाथि काम गरिरहेको एनजिओ केआई नेपाललाई सम्पर्क गरिन् । बिरगञ्ज पुलिसको सहयोगमा केआई नेपाल आकाशको घरमा पुग्यो र विवाह रोक्यो । दिल्ली महिला आयोगले मञ्जुलाई आकाशविरुद्ध घरेलु हिंसा र दाइजो प्रताडनाको मुद्दा हाल्न सहयोग गरिरहेको छ ।