अवैध सुनसहित नेपाल एअरलाइन्सका कर्मचारी पक्राउ

काठमाण्डाै – अवैध ३० तोला सुनसहित नेपाल एअरलाइन्सका १ जना कर्मचारी पक्राउ परेका छन । महानगरी प्रहरी परिसर, काठमाण्डाैले सोमबार पत्रकार सम्मेलन गरी अवैध ३० तोला सुनसहित त्रिभवन अन्तराष्ट्रिय विमानस्थलबाट नेपाल एअरलाइन्सका मेन्टिनेन्स ह्यांगरमा कार्यरत कर्मचारी रञ्जितकुमार यादवलाई नियन्त्रणमा लिइएको जानकारी गराएको हो ।

उनलाई आइतबार दोहाबाट आएको नेपाल एयरलाइन्सको फ्लाइटका यात्रु सिरहाका धर्मेन्द्रकुमार यादवले ल्याएको त्याे अवैध सुनसहित पक्राउ गरिएको वरिष्ठ प्रहरी उपरीक्षक बसन्तकुमार लामाले जानकारी दिनु भयो । उहाँले अनुसन्धानका क्रममा दोहाबाट नेपाल एअरलाइन्समा आउने यात्रुहरुलाई आर्थिक प्रलोभनमा पारेर अवैध सुन पठाउने गरेको पाइएको पनि बताउनुभयो ।

यात्रुहरुले ल्याएको अवैध सुन नेपाल एअरलाइन्सका कर्मचारी यादवले बुझ्ने गरेको प्रहरीको प्रारम्भिक अनुसन्धानमा खुल्न आएको छ  घटनाबारे थप अनुसन्धान भैरहेको पनि प्रहरीले जनाएको छ ।