चेन्नई फाइनलमा, दिल्लीको पराजयसँगै सन्दीपको यो सिजनको आईपीएल यात्रा टुंगियो

काठमाडौं, २८ वैशाख । इण्डियन प्रिमयर लिगको १२औं सिजनको क्वालिफायर-२ मा चेन्नई सुपरकिंग्सले दिल्ली क्यापिटल्सलाई ६ विकेटले हराएको छ । विशाखापट्टनमको वाईएसआर रेड्८ी स्टेडियममा खेलिएको खेलमा दिल्लीले २० ओभरमा ९ विकेटको क्षतिमा १४७ रन बनाएको थियो । दिल्लीले दिएको लक्ष्य पछ्याएको चेन्नईले १९औं ओभरमा ४ विकेटको क्षतिमा १५१ रन बनाएर खेल जितेको हो । चेन्नईको आईपीएलमा यो १०औं सिजन हो । उसले ८ पटकसम्म फाइनलमा स्थान बनाएको छ । चेन्नईको आईपीएलमा यो १००औं जित हो । च्याम्पियन्सको लागि चेन्नईसँग भिड्दै गरेको मुम्बई ईण्डियन्सले भने अहिलेसम्म १०८ खेल जितिसकेको छ ।

चेन्नईले लगातार दोस्रोपटक क्वालिफायर-२ मा दिल्लीलाई हराएको छ । चेन्नईको जितमा फाफ डुप्लेसिसको यो सिजनको तेस्रो र समग्रमा १२औं अर्धशतकले काम गर्‍यो । उनी प्लेयर अफ द म्याच पनि भए । उनले ५० रनको पारी खेल्दा ७ चौका र एक छक्का हिर्काए । शेन वाट्सनले यो सिजनको दोस्रो र समग्रमा १८औं अर्धशतक हिर्काए । उनले ३ चौका र ४ छक्कासहित अर्धशतक बनाएका हुन् । सुरेश रैना भने १६औं ओभरको आखिरी बलमा ११ रन बनाएर आउट भए । उनी अक्षर पटेलको बलमा बोल्ड भएका हुन् । उनी आउट हुँदा चेन्नईसँग १२७ रन थियो । महेन्द्र सिंह धोनी चेन्नईको चौथो विकेटको रुपमा पतन भए । चेन्नईलाई जितका लागि २ रन चाहिएको बेला इशान्त शर्माको बलमा किमो पलले डीप स्क्वाइर लेगमा धोनीलाई क्याच गरे । धोनी ९ बलमा ९ रन बनाएर आउट भए । अम्बाती रायडू २० रन बनाएर अविजित रहे ।

यसअघि दिल्लीको लागि ऋषभ पतले सबैभन्दा धेरै ३८ रन बनाए । शिखर धवनले १८, कोलिन मुनरोले २७, श्रेयस अय्यरले १३, रदरफोर्डले १० र इशान्त शर्माले १० रनको पारी खेले । यी बाहेक दिल्लीका कुनै पनि ब्याट्सम्यानले दोहोरो अंक बटुल्न सकेनन् । चेन्नईका लागि दिपक चहर, हरभजन सिंह, रविन्द्र जडेजा र ड्वेन ब्रावोले २/२ विकेट लिए । इमरान ताहिरले एक विकेट लिए । हरभजनले शेरफेन रदरफोर्डलाई प्याभेलियन फर्काउँदै आफ्नो आईपीएल करिअरमा १५० विकेट लिन सफल भए । उनी आईपीएलमा १५० रन वा त्योभन्दा बढी विकेट लिने तेस्रो बलर हुन् । यसअघि लसिथ मलिंगाले १६९ विकेट र अमित मिश्रले १५६ विकेट लिइसकेका छन् । दिल्लीको पराजयसँगै नेपाली युवा स्पिनर सन्दीप लामिछानेको यो सिजनको आईपीएल यात्रा टुंगिएको छ । उनी पछिल्ला खेलहरुमा बेञ्चमै सीमित बनाइएका थिए ।