क्लब छाड्ने हल्ला चलेपछि रामोसको प्रतिक्रिया ‘ रियलबाटै सन्यास लिन्छु ’

एजेन्सी । रियल मड्रिडका कप्तान सर्जियो रामोसले रियल मड्रिड नछाड्ने बताएका छन् । रियल मड्रिड छाड्न लागेको हल्ला चलेपछि पत्रकार सम्मेलन गरी उनले क्लबमै रहने बताएका हुन् ।

पछिल्लो समयमा रियल मड्रिडको अवस्था खस्कँदो छ । खस्कँदो प्रदर्शनका कारण कप्तान रामोसको आलोचना भइरहेको छ । आलोचना भएपछि उनले क्लब छाड्ने हल्ला चलेको थियो । तर कप्तान रामोसको चलेका हल्लाहरु निराधार भएको पत्रकार सम्मेलन गरी जानकारी दिए । ‘म यहीँबाट सन्यास लिन चाहन्छु । मेरो बारेमा धेरै अनुमान गरिएको छ ।’ उनले भने ‘ म यो क्लबमै बस्न चाहान्छु ।’

यसअघि रामोसले क्लबका अध्यक्ष फ्लोरेन्टिनो पेरेजसँग सम्बन्ध चिसिएपछि क्लब छाड्ने हल्ला भएको थियो । रामोसले चिनियाँ क्लबबाट आफूलाई अफर आए पनि आफूले इच्छा नगरेको बताए । ‘ मलाई चीनबाट पनि अफर आएको छ । म यहींबाट करिअर पूरा गर्न चाहन्छु ।’३३ वर्षीय रामोस सन् २००५ देखि रियलबाट खेलिरहेका छन् । रियलले उनलाई सेभिल्लाबाट ल्याएको थियो ।