भूतपूर्व भारतीय सैनिकको सुविधाका लागि म्याग्दीमा सैनिक बोर्ड स्थापना

काठमाडौँ । म्याग्दीमा भारतीय सेनाबाट सेवानिवृत्त सैनिकको सुविधाका लागि जिल्ला सैनिक बोर्डको कार्यालय स्थापना गरिएको छ। म्याग्दी को सदरमुकाम बेनीमा स्थापना भएको बोर्डको सोमबार भारत सरकारका रक्षा सहचारी कर्नेल अवनिश चाम्बियलले उद्घाटन गरेका हुन्। भारतीय रक्षा सहचारी कर्नेल चाम्बियलले बोर्ड स्थापना गर्न सफल भएकोमा जिल्लाका भुपूसैनिकलाई बधाई तथा शुभकामना व्यक्त गरे।

उनले भारत सरकार र नेपाल सरकारबीचको सम्झौताअनुसार तथा म्याग्दीवासीको माग र आवश्यकतालाई ध्यानमा राखी म्याग्दीमा जिल्ला सैनिक बोर्ड स्थापना गरिएको बताए ।साथै उनले बोर्ड स्थापनासँगै भारतीय सेनाबाट अवकाशप्राप्त भुपूसैनिकले पाउने सेवासुविधा जिल्लामै पाउने जानकारी दिए । भारत र नेपाल सरकारको सम्बन्ध प्राचीनकालदेखि नै सांस्कृतिक, धार्मिक तथा राजनीतिकरूपमा प्रगाढ रहको उनको भनाइ थियो ।

नेपाली भुपूसैनिकको हरेक समस्या समाधानका लागि भारत सरकार जस्तोसुकै सहयोग गर्न तयार रहेको उनले बताए। कार्यक्रममा प्रमुख जिल्ला अधिकारी लीलाधर अधिकारीले सैनिक बोर्ड स्थापनाले भुपूसैनिकलाई ठूलो टेवा पुग्ने विश्वास व्यक्त गरे ।कार्यक्रममा भुपूसैनिक कल्याणकारी सेवा केन्द्र म्याग्दीका अध्यक्ष क्याप्टेन मीनबहादुर कार्कीले म्याग्दीका भुपूसैनिकको १६ वर्षसम्मको सङ्घर्षपछि जिल्ला सैनिक बोर्ड स्थापना हुन सफल भएको बताए । म्याग्दीमा पाँच हजार बढी भारतीय भुपू सैनिक रहेका उनले जानकारी दिए ।