जलविद्युत् आयोजनाका सुरुङ भित्र थुनिएका मजदुरको १२ घण्टा पछि उद्धार

रसुवा । रसुवामा निर्माणाधीन रसुवागढी जलविद्युत आयोजनाको सुरुङभित्र थुनिएका कामदारलाई सकुसल रुपमा उद्धार गरिएको छ । बिहिवार थुनिएका कामदारलाई शुक्रवार बिहान सकुसल रुपमा उद्धार गरिएको हो ।

रसुवाका प्रहरी प्रमुख भागेन्द्रपुरुष ढकालका अनुसार छ चिनियाँ नागरिकसहित १७ कामदारलाई आज बिहान सात सकुसल उद्धार गरिएको हो । उद्धार गरिएका १७ कामदारको उद्धारपश्चात स्थानीय स्वास्थ्यकर्मीबाट स्वास्थ्य परीक्षण गरिएको थियो ।

बिहिवार साँझदेखि गएको सुक्खा पहिरोमा फाटफुटरूपमा ढुङ्गा झरिरहेकाले विद्युत् आयोजनाको सुरुङको काम आजकालागि रोकिएको रसुवाका प्रमुख जिल्ला अधिकारी अर्जुन भण्डारीले बताए । विद्युत् आयोजनाको निर्माणमा चिनियाँ ठेकेदार कम्पनी सीडब्ल्यूईले कामदारको सुरक्षालाई दृष्टिगत गरी निर्माण कार्य अगाडि बढाइने बताएको छ । उद्धारका लागि नेपाली सेना, नेपाल प्रहरी, सशस्त्र प्रहरी बल र जलविद्युत् कम्पनीका कर्मचारी जुटेका थिए । रासस