आफ्ना सन्तान सरह बिरुवाको संरक्षण गरेर हुर्काउन प्रधानमन्त्रीको आग्रह ,हेर्नुहोस् फोटो फिचर

काठमाडौं । विश्वमा प्रकृति भन्दा महान र सुन्दर अरु केही छैन । प्रकृतिका कारण नै आज मानिस अस्तित्वमा छ । तर मानिसहरुले पछिल्लो समय गर्ने हर्कतले कतै प्रकृतिमा समस्या आएको त होईन धेरैको आशंका रहेको छ । जुन देशहरु विकासको मार्गमा दौडिरहेका छन्, उनिहरुले नै वातावरण नष्ट पार्ने कुरामा मुख्य भुमिका खेलेको धेरैको बुझाई रहेको छ । नेपाल पनि प्राकृतिक रुपमा खुबै सुन्दर देश हो । प्रकृतिको संरक्षणका लागि प्रधानमन्त्री केपी शर्मा ओलीले आफ्ना सन्तान सरह बिरुवाको संरक्षण गरेर हुर्काउन आग्रह गर्नुभएको छ ।

वृक्षारोपण दिवसको अवसरमा आज कोटेश्वर–कलंकी सडकको किनारामा वृक्षारोपण गर्दै प्रधानमन्त्री ओलीले यस्तो जानकारी दिनुभएको हो । प्रधानमन्त्री ओलीले कोटेश्वर सडकको किनारमा नासपातीको बिरुवा रोप्नु भएको छ । सरकारले यस बर्षदेखि असार १४ गतेलाई वृक्षारोपण दिवसको रुपमा मनाउने घोषणा गरेको हो । प्रधानमन्त्री ओलीले वृक्षारोपणमा भन्दा तिनलाई संरक्षण गर्ने र हुर्काउनेमा प्रतिष्पर्धा हुनुपर्ने उल्लेख गर्नुभयो ।

उहाँले भन्नुभयो, ‘हामीले रोपेका विरुवालाई आफ्ना सन्तान सरह माया गरेर हुर्काउनु पर्दछ । अबको प्रतिष्पर्धा विरुवा संरक्षण गर्नेमा हुनुपर्दछ ।’ वृक्षरोपण दिवस सरकारको मात्र कार्यक्रम नभएर गैह्र सरकारी संस्था र व्यक्तिको पनि कार्यक्रम भएको प्रधानमन्त्री ओलीले स्पष्ट पार्नुभयो । उहाँले, ‘हाम्रा पुर्खाले विरुवा र मानवको सम्बन्ध उहिल्यै पत्ता लगाएका थिए । त्यसको धार्मिक, वातावरणीय,जैविकआदि उपयोगिता व्यबहारबाटै थाहा पाएर उनीहरुले विरुवाको संरक्षण गर्थे । हामीले पनि त्योकुराको अनुकरण गर्नु पर्दछ ।’ प्रधानमन्त्री ओलीले वन क्षेत्र भनिए पनि नेपालका कतिपय क्षेत्रहरुम वन नभएकाले त्यस्ता ठाउँलाई साँच्चिकै वन क्षेत्र बनाउनु पर्ने बताए ।