होटेलमा युवक मृत फेला, सँगै बसेकी युवती पक्राउ

दाङको तुलसीपुरमा रहेको एक होटेलमा एक युवक मृत फेला परेका छन्। मानसरोवर होटेलमा बाँकेको कोहलपुर निवासी अन्दाजी २७ वर्षीय रमेश हमाल मृत फेला परेको इलाका प्रहरी कार्यालय तुलसीपुरका प्रमुख प्रेमबहादुर शाहीले जानकारी दिए। उनलाई होटेलको कोठामा झुन्डिएको अवस्थामा फेला परेको शाहीको भनाई छ।

हमाल एक युवतीसँगै होटेलमा बसेका थिए। सँगै होटलमा बास बसेका युवकले आत्महत्या गरेको अवस्थामा फेला परेपछि युवतीलाई ईलाका प्रहरी कार्यालय तुलसीपुरले नियन्त्रणमा लिएको छ। रुकुम जिल्ला निवासी विक थरकी युवती र मृतक हमाल बिहीबार राति १० बजेतिर होटलमा बास बसेका होटल सञ्चालक बताउँछन्। युवतीले आफू निदाएको समयमा हमालले डोरीले पासो लगाएर आत्महत्या गरेको भन्ने बयान प्रहरी समक्ष दिएकी छन्।

‘म निदाएको समयमा आवाज सुनेपछि उठेर हेर्दा झुन्डिएको देखेँ। मैले बचाउन अनेक प्रयास गर्दा निकाल्न सकिनँ अनि तत्काल म दौडिएर होटल मालिकलाई बोलाएर ल्याएकी हुँ,’ युवतीको भनाइ उद्धत गर्दै प्रमुख शाहीले भने । घटनाबारे थप अनुसन्धान भइरहेको प्रहरीले जानकारी दिएको छ।