पुरुष भलिबल : सेमिफाइनल समीकरण पूरा

कास्की – नवौँ राष्ट्रिय खेलकुद प्रतियोगिताअन्तर्गत पुरुष भलिबलमा सेमिफाइनल समीकरण पूरा भएको छ ।

पोखरा रङ्गशालाको कोर्टमा आज मङ्गलवार भएको अन्तिम क्वाटर–फाइनल खेलमा गण्डकी प्रदेशले प्रदेश १ हराउँदै अन्तिम चारमा स्थान बनाउँदा पुरुष भलिबलमा सेमिफाइनल समीकरण पूरा भएको हो ।

एकतर्फीजस्तै देखिएको खेलमा गण्डकीले प्रदेश १ लाई २५–२०, २५–२१ र २५–१३ को सोझो सेटमा हराउँदै अन्तिम चारमा स्थान पक्का गरेको हो । हारसँगे प्रदेश १ भने प्रतियोगिताबाट बाहिरिएको छ ।

आजै भएको अर्काे खेलमा एपीएफले लुम्बिनी प्रदेशमाथि तीन–एकको सेटमा जित निकालेको हो । पहिलो सेट २५–२१ ले आफ्नो पक्षमा पारेको एपीएफले दोस्रो सेट २८–२६ ले जितेको थियो । तेस्रो सेट भने लुम्बिनीले २५–२३ ले जित्यो । चौथो सेटमा एपीएफले २५–१७ ले जितेर अन्तिम चारमा आफ्नो स्थान पक्का गरेको हो ।

खेलको क्रममा एपीएफका लगातार तीन खेलाडी घाइते भएपछि क्वाटर–फाइनलको खेल केही समयका लागि स्थगित भएको थियो । खेलाडीकै विरोधपछि म्याट झिकेर खेलाइएको थियो । राष्ट्रिय प्रतियोगिता भए पनि भलिबल चाहिँ पुरानै नेट र म्याटमा खेलाइएको छ । पुरानो म्याट भएका कारण चिप्लिएर लगातार खेलाडी घाइते भएका हुन् ।

भोलि बुधवार दुई सेमिफाइनल खेल हुनेछ । पहिलो सेमिफाइनलमा नेपाल पुलिस क्लब र त्रिभुवन आर्मी क्लब खेल्नेछन् । दोस्रो सेमिफाइनलमा गण्डकी प्रदेश र एपीएफ खेल्नेछन् । प्रतियोगिताको फाइनल भने पर्सि बिहीवार हुनेछ उज्यालो