अमेरिकी राष्ट्रपति ट्रम्प प्रशासनले बढाएको नयाँ भन्सार दर कार्यान्वयनमा

अमेरिकाका राष्ट्रपति डोनाल्ड ट्रम्पले घोषणा गरेअनुसार ९० भन्दा बढी देशले उनीहरुका सामान अमेरिका पठाउँदा तिर्नुपर्ने नयाँ भन्सार दर आजदेखि कार्यान्वयनमा आएको छ । अब विभिन्न देशबाट अमेरिका सामान आयात गर्ने कम्पनीहरूले अमेरिकी सरकारलाई कर तिर्नुपर्ने छ । ती कम्पनीहरूले त्यसरी बढेको खर्चको भार उपभोक्तामाथि थपिदिने भएकाले अमेरिकामा सामान महँगो हुनेछ ।

यस्तै मूल्य बढेसँगै आफ्नो सामानको निर्यात घट्ने निर्यातकर्ता देशहरुको चिन्ता छ । आजदेखि अमेरिकामा उच्च भन्सार दर तिर्नुपर्ने देश ब्राजिल बनेको छ । ब्रजिलबाट आयातित सबैजसो वस्तुमा ५० प्रतिशत शुल्क तोकिएको छ । भारतमाथि पनि ट्रम्पले ५० प्रतिशत शुल्क तोक्नुभएको छ । तर भारतीय वस्तुमाथिको नयाँ भन्सार दर २७ अगस्टदेखि कार्यान्यवनमा आउने छ ।

अमेरिका र चीनबीच नयाँ भन्सार दरबारेमा वार्ता भइरहेको छ । दुवै देश एक अर्का विरुद्ध बढाएको नयाँ भन्सार दर तत्काल कार्यान्वयन नगर्न सहमत भएका छन् । अमेरिकाले छिमेकी देश मेक्सिकोका लागि ९० दिनसम्म पुरानै कर यथावत् रहने बताएको छ । अर्को छिमेकी देश क्यानडामाथि भने ३५ प्रतिशत भन्सार दर कार्यान्वयनमा आएको छ ।

यसैबीच अमेरिकाले अन्तर्राष्ट्रिय कानूनअन्तर्गत मुख्य व्यापार प्रतिबद्धताहरूको उल्लङ्घन गरी चर्को कर लगाएको भन्दै परामर्शका लागि विश्व व्यापार सङ्गठन (डब्लुटीओ) सँग अनुरोध गरेको छ ।

यता भारतीय प्रधानमन्त्री नरेन्द्र मोदीले अमेरिकाले ५० प्रतिशत भन्सार शुल्क लगाए पनि आफ्ना किसानहरूको हित विपरित कुनै सम्झौता नगर्ने बताउनुभएको छ । आज दिल्लीमा आयोजित एक कार्यक्रममा बोल्दै मोदीले किसान, पशुपालक र माझीहरूको हित विपरित कसैसँग पनि सम्झौता नगर्ने बताउनुभएको बीबीसीले जनाएको छ ।  उज्यालो