बेलायतमा रेलभित्र छुरा प्रहार, ९ जना गम्भीर घाइते

बेलायतमा रेलभित्र छुरा प्रहार हुँदा १० जना यात्रु घाइते भएका छन् । गएराति पूर्वी बेलायतको क्याम्ब्रिजशरको हन्टिङ्डन स्टेशनमा यात्रुमाथि छुरा प्रहार हुँदा ९ जना गम्भीर घाइते भएका बीबीसीले जनाएको छ ।

बेलायतका प्रधानमन्त्री किअर स्टार्मरले यो घटनालाई भयानक भन्नुभएको छ । यो घटनापछि त्यस क्षेत्रका सबै रेल सेवाहरू रोकिएका खबरमा उल्लेख छ ।

यसैबीच छुरा प्रहार भएको घटनामा संलग्न रहेको आरोपमा प्रहरीले दुई जनालाई पक्राउ गरेको छ । प्रहरीले पक्राउ गरेको दुवै जना पुरुष बेलायती नागरिक हुन् ।

सरकारी तथ्याङ्क अनुसार बेलायतमा सन् २०११ देखि छुरा प्रहारका अपराध ‘निरन्तर’ बढिरहेको पाइन्छ । गएको वर्ष व्यापक सरकारी कारबाहीका क्रममा ६० हजार चक्कु आफूलाई प्राप्त भएको वा जफत गरिएको प्रहरीले बताएको छ ।

बेलायतमा सार्वजनिक रूपमा चक्कु बोक्दा चार वर्षसम्मको जेल सजाय हुन सक्ने कानूनी व्यवस्था छ । उज्यालो