ग्रिनल्याण्डलाई लिएर अमेरिका र युरोपबीच तनाव

अमेरिकी राष्ट्रपति डोनाल्ड ट्रम्प प्रशासनले ग्रिनल्याण्ड अधिग्रहणका विभिन्न विकल्पहरूबारे छलफल गरिरहेको खुलासा भएपछि अमेरिका र युरोपेली देशहरूबीच कूटनीतिक तनाव चर्किएको छ ।

ह्वाइट हाउसले ग्रिनल्याण्डलाई अमेरिकाका लागि राष्ट्रिय सुरक्षाको सवाल भन्दै आवश्यकता परे सैन्य शक्तिको प्रयोग पनि एक विकल्पमा रहेको बताएपछि तनाव उत्पन्न भएको हो । राष्ट्रपति ट्रम्पले पछिल्लो समय पटक–पटक ‘हामीलाई ग्रिनल्याण्ड चाहिन्छ’ भन्ने अभिव्यक्ति दिनुभएको र यसले अन्तर्राष्ट्रिय चाँसो र प्रतिक्रिया बढाएको बीबीसीले जनाएको छ ।

डेनमार्क र युरोपेली देशहरू अमेरिका विरुद्ध एकजुट भएका छन् । बेलायत, फ्रान्स, जर्मनी, इटाली, पोल्यान्ड, स्पेन र डेनमार्कले संयुक्त वक्तव्य निकाल्दै ग्रिनल्याण्डको सार्वभौमिकता, भौगोलिक अखण्डता र अन्तर्राष्ट्रिय कानुनको सम्मान गर्न आग्रह गरेका छन् । डेनमार्ककी प्रधानमन्त्री मेट्टे फ्रेडरिक्सेनले चेतावनी दिँदै अमेरिकाबाट हुने कुनैपनि आक्रमणले नाटो गठबन्धन नै कमजोर वा समाप्त हुन सक्ने बताउनुभएको छ ।

ग्रिनल्याण्डका प्रधानमन्त्री जेन्स–फ्रेडरिक निल्सेनले युरोपेली समर्थनको स्वागत गर्दै सम्मानजनक संवादको माग गर्नुभएको छ । तर अमेरिकी विदेशमन्त्री मार्को रुबियोले अमेरिकाको उद्देश्य आक्रमण नभई डेनमार्कबाट ग्रिनल्याण्ड खरिद गर्ने वा विशेष सहकार्य गर्ने विकल्पमा छलफल केन्द्रीत रहेको बताउनुभएको छ । यद्यपि ह्वाइट हाउसले सेनाको प्रयोग सधैं सम्भावित विकल्प रहने यसअघि नै बताईसकेको छ ।

ग्रिनल्याण्डमा भने ट्रम्प प्रशासनको अभिव्यक्तिप्रति आक्रोश र डर दुवै देखिएको छ । नागरिकहरु आफूहरू कुनै किनबेचको वस्तु नभएको भन्दै कडा असन्तोष जनाइरहेका छन् । जनमत सर्वेक्षणहरूमा धेरैजसो ग्रिनल्याण्डवासी अमेरिकाको हिस्सा बन्ने कुराको विरोधमा देखिएका छन्, यद्यपि भविष्यमा डेनमार्कबाट पूर्ण स्वतन्त्रता चाहने चाहना पनि बलियो छ ।

विश्लेषकहरूका अनुसार, आर्कटिक क्षेत्रमा रूस र चीनको बढ्दो चासो, दुर्लभ खनिज स्रोत र नयाँ समुद्री व्यापार मार्गको सम्भावनाका कारण ग्रिनल्याण्ड विश्व शक्ति राष्ट्रहरूको चाँसोका रुपमा रहदै आएको छ । यही कारण ग्रिनल्याण्डलाई लिएर अमेरिका र युरोप सम्बन्धमा नयाँ भू–राजनीतिक चुनौती सिर्जना भएको छ । उज्यालो