निरेम प्रोडक्सन कुवेतको मानवतावादी पहल: दार्चुलाको दुर्गा स्थान माविलाई १ लाख सहयोग

कुवेतस्थित निरेम प्रोडक्सनले सुदूरपश्चिम प्रदेश, दार्चुला जिल्लाको दुर्गम क्षेत्र ब्यास गाउँपालिका–५ मा रहेको दुर्गा स्थान माध्यमिक विद्यालयलाई विद्यार्थीको बौद्धिक क्षमता अभिवृद्धिका लागि १ लाख रुपैयाँ सहयोग गरेको छ। सुदूरपश्चिमेली नेपाली समाज कुवेतका संरक्षक गगन सिंह बिष्ट को सक्रिय पहलमा विकट भेगका बालबालिकाको शिक्षामा सानो भए पनि ठोस टेवा पुगोस भन्ने उद्देश्यले यो सहयोग प्रदान गरिएको हो।

हरेक वर्ष कुवेतमा सांगीतिक साँझ आयोजना गर्दै निरेमले नेपालका दुःखी, पीडित र पछाडि परेका समुदायमा निरन्तर सहयोग गर्दै आएको छ। यस वर्ष पनि अतिथि कलाकार राजु लामा सहित सम्पन्न निरेम सांगीतिक उत्सवबाट संकलित रकमको एक हिस्सा दार्चुलाको अत्यन्त दुर्गम बस्तीमा रहेको उक्त विद्यालयलाई हस्तान्तरण गरिएको हो।

यो सहयोग रकम विद्यालयमा विद्यार्थीको शैक्षिक गुणस्तर सुधारसँगै खेलकुद, साहित्य र संगीतजस्ता अतिरिक्त क्रियाकलाप सञ्चालनमा प्रयोग हुनेछ। किताब र कक्षाकोठाभन्दा बाहिरको सिकाइले बालबालिकाको सोच, आत्मविश्वास र सिर्जनशीलता बढाउँछ भन्ने विश्वासका साथ निरेमले यो पहल अघि बढाएको हो।

नाफाभन्दा मानवतालाई प्राथमिकता दिने निरेमको यो कदम केवल सहयोग मात्र होइन, दुर्गम भेगका सपनाहरूलाई उज्यालो दिने साहसिक प्रयास हो। टाढा देशमा बसेर पनि मातृभूमिका बालबालिकाको भविष्यका लागि हात बढाउने निरेमको यो साहस र प्रतिबद्धताले समाजलाई सकारात्मक सन्देश दिएको छ।