युरोपेली संघ इयु छोड्ने ब्रेक्जिट सम्बन्धी सम्झौता प्रस्तावमा सहमति

एजेन्सी, २९ कात्तिक । युरोपेली संघ इयु छोड्ने ब्रेक्जिट सम्बन्धी सम्झौता प्रस्तावमा सहमति भएको छ।ब्रिटेनको बहिर्गमनसम्बन्धी विस्तृत शर्तहरूबारे इयुसँग भएको मस्यौदा सम्झौतालाई आफ्नो मन्त्रिपरिषदले अनुमोदन गरेको ब्रिटिश प्रधानमन्त्री टरिजा मे ले बताएकी छन्।

मिडिया रिपोर्टका अनुसार मन्त्रिपरिषदमा लामो र सघन छलफल भएको थियो ।उनले भनेकी छिन्, हाम्रा सामु अप्ठेरा विकल्पहरू थिए। तर यो उपलब्धमध्ये उत्तम विकल्प हो र यो ब्रिटेनको राष्ट्रिय स्वार्थ बमोजिम छ।

मन्त्रिपरिषदमा ९ जना मन्त्रीहरूले उक्त प्रस्तावको विरोधमा बोलेको मिडिया रिपोर्टमा उल्लेख छ।विपक्षी लेबर दलका नेता जेरेमी कोर्बीनले उक्त सम्झौता ब्रिटेनको राष्ट्रिय स्वार्थ अनुकुल भएको आफूलाई नलागेको बताए।

उनको दलले सो प्रस्तावको विपक्षमा संसदमा मत दिने कि नदिने बारे बिहीवार निर्णय हुने उनले बताए।सत्ताधारी कन्जरभेटिभ दलभित्रै पनि सो प्रस्ताव विरुद्ध मत बलियो रहेको छ।