‘स्वास्थ्य केन्द्रलाई एम्बुलेन्स, विद्यालयलाई कम्प्युटर’

धादिङ, १३ मंसिर । स्वास्थ्य तथा शिक्षामा नागरिक पहुँच नेपालको सहयोगमा सल्यानटार प्रारम्भिक स्वास्थ्य केन्द्रलाई एम्बुलेन्स हस्तान्तरण गरिएको छ । धादिङ क्षेत्र नं. २ (२) का प्रदेशसभा सांसद जगत सिंखडाले बुधबार उक्त सहयोग हस्तान्तरण गरेका हुन् । एम्बुलेन्स हस्तान्तरणसँगै सेवा बिस्तार गर्ने सिलसिलामा अर्को एउटा महत्त्वपूर्ण उपलब्धि हासिल भएको भन्दै सांसद सिंखडाले सहयोगी हातहरुलाई कृतज्ञता ज्ञापन गरेका छन् । एम्बुलेन्स सेवा सुरुसँगै त्रिपुरासुन्दरी गाउँपालिका वडा नं. २ का नागरिकको स्वास्थ्य सेवाको पहुँचमा बिस्तार भएको उनले बताए ।

एम्बुलेन्स हस्तान्तरण कार्यक्रममा संस्थाका अध्यक्ष सितलचन्द्र धरेल लगायतको उपस्थिति थियो ।यसैबीच, सिंखडाले रानी पौवा उच्च माविलाई कम्प्युटर समेत हस्तान्तरण गरेका छन् । यही साता उनले धादिङको टारीबेसीको बाटो निरक्षण गर्दै त्यहाँ कार्यरत मजदुरसँग अन्तरक्रिया समेत गरेका छन् । स्थानीय जनताको काम गर्न गाउँपालिकाले ढिलासुस्ती गरिरहेको भन्दै जनप्रतिनिधितले निर्वाचनमा गरेको प्रतिवद्धता सम्झिएर काम गर्न सांसद सिंखडाले आह्वान गरे ।