कलङ्की–महाराजगञ्ज सडक विस्तारका लागि अध्ययन शुरु

ललितपुर । चक्रपथको कोटेश्वर कलङ्की सडक निर्माण पूरा हुँदै गर्दा कलङ्कीदेखि महाराजगञ्ज सडकको अध्ययन शुरु भएको छ।यो सडकमा कति ‘अण्डर पास’ तथा कति आकाशे पुल आवश्यक पर्ने र त्यसका लागि कति लगानी चाहिनेजस्ता कुरा अध्ययनले टुङ्गो लगाउने सडक विभागका सहप्रवक्ता रमेशकुमार सिंहले बताए।

चिनियाँ सरकारले नै निर्माण गर्ने झण्डै १२ किलोमिटर लामो उक्त सडक कोटेश्वर कलङ्की सडकजस्तै ८ लेनको हुने जानकारी दिँदै उनले भने, ‘मुख्य लेन र सहायक गरेर ८ लेनको हुने र दुवैतर्फ एकएक लेनको सर्भिस ट्र्याक हुनेछ।’

सरकारले यो सडकको ७ ठाउँमा आकाशे पुल निर्माण शुरु गरेको छ। सम्झौतामा उल्लेख भएअनुसार चिनियाँ निर्माण कम्पनीले निर्माण गरेको ३ पुल पर्याप्त नभएपछि सरकार आफैँले थप पुल निर्माण थालेको हो।

विभागको वैदेशिक महाशाखालले सडक निर्माणको विस्तृत अध्ययन गरिरहेको छ। सहप्रवक्ता सिंहले भने, ‘डिजाइन रिपोर्ट आएपछि कुन–कुन ठाउँमा कसरी काम गर्ने भन्ने योजना बन्नेछ।’