सामूहिक बलात्कारका कारण १७ वर्षीय युवतीको मृत्यु, फरार मुख्य अभियुक्त पक्राउ

दाङ, ६ माघ । सामूहिक बलात्कारको घटनामा सर्वोच्च अदालतवाट २०७२ फागुन ३० गतेको फैसला अनुसार ९ वर्ष ११ महिना २ दिन कैद सजाय र ५० हजार रुपैयाँ जरिवाना तोकी फरार रहेका मुख्य अभियुक्त पक्राउ परेका छन् । साविकको बिजौरी गाविस–५ घर भई हाल तुलसीपुर उप–महानगरपालिका–१८ बस्ने ३१ वर्षीय विष्णु चौधरीलाई बिहीबार प्रहरीले पक्राउ गरेको छ ।

गत २०६५ चैत १५ गते महेन्द्र वहुमुखी क्याम्पस घोराहीमा प्लस टु मा अध्ययनरत १७ वर्षीया किशोरीलाई नसालु पदार्थ खुवाई सामूहिक बलात्कार पश्चात ८४औं दिनमा किशोरीको मृत्यु भएको थियो ।

घटनामा संलग्न मुख्य अभियुक्त चौधरीलाई जिल्ला प्रहरी कार्यालय दाङबाट खटिएको प्रहरीले खोजी गर्ने क्रममा तुलसीपुर उपमहानगरपालिका–१८ मा फेला पारी पक्राउ गरेको हो । साथै उक्त घटनामा संलग्न अन्य ६ जनाले यसअघि सजाय भुक्तान गरेको र घटनामा संलग्न फरार रहेका मोहन पुनको खोजी गरिरहेको जिल्ला प्रहरी कार्यालय दाङले जनाएको छ । यस सम्बन्धमा प्रहरीले आवश्यक अनुसन्धान गरिरहेको जनाएको छ ।