चितवनमा बनाउन लागिएको गौतम बुद्ध क्रिकेट स्टेडियमका लागि धुर्मुस-सुन्तलीलाई मलेसियाबाट ३५ लाख

चितवनमा बनाउन लागिएको गौतम बुद्ध क्रिकेट स्टेडियमका लागि आर्थिक जोहो गर्न यतिबेला सिताराम कट्टेल धुर्मुस र कुञ्जना घिमिरे दौडाहामा छन् । स्टेडियम बनाउने घोषणा गरेर सिलान्यास पछि मलेसिया पुगेका उनीहरुका बारेमा सामाजिक सञ्जाल र समाचारमा नकारात्मक कुरा आए ।

मलेसियावाट रित्तो हात फर्के भनेर आएको समाचारको खण्डन गर्दै धुर्मुसले आफुहरुले गरेको अपेक्षा भन्दा पनि बढी सहयोग पाएको बताए । उनले मलेसियामा बस्ने नेपालीहरुले क्रिकेट स्टेडियमका लागि भन्दै ३५ लाख रुपैया भन्दा बढी सहयोग गरेको बताएका छन् ।

क्रिकेट स्टेडियम निर्माणका लागि सहयोग अभियान लिएर पहिलो पटक उनीहरु मलेसिया पुगेका थिए । उनीहरुले त्यहाँ विभिन्न प्रस्तुती दिए । त्यहाँ पुगेका कलाकार सीताराम कट्टेल धुर्मुस र कुञ्जना घिमिरे सुन्तलीको उपस्थितिमा विभिन्न तीन सहरमा कार्यक्रम भएको थियो । कार्यक्रममा ३५ लाख ७१ हजार रुपैयाँ सहयोग जुटेको जानकारी धुर्मुसले दिएका छन् ।

मलेसियाका तीन शहरहरु क्वालालम्पुर, जोहोरबारु र पेनाङमा कार्यक्रम गरिएको थियो । कार्यक्रममा उपस्थित भएका नेपालीहरुले स्वःस्फूर्त रुपमा आर्थिक सहयोग संकलन गरेका हुन् । कार्यक्रमस्थलबाटै २० लाख ७१ हजार रुपैयाँ स्टेडियम निर्माण अभियानलाई सहयोग जुटेको हो भने आयोजक सिटी एक्सप्रेसले १५ लाख थपिदिएको जानकारी उनले दिए ।

उनले आफुहरुलाई मलेसियामा बस्ने नेपालीले देखाएको सदासयताको तारिफ गरेका छन् । त्यसले आफुहरुलाई थप उत्साही बनाएको उनीहरुको भनाई छ । धुर्मुसले क्रिकेट स्टेडियम निर्माणका लागि विदेशमा रहेका नेपालीले ठुलो आँट र हिम्मत दिएको पनि बताएका छन् ।