सोलुखुम्बुमा जीप दुर्घटना, ६ जनाको मृत्यु

काठमाडौँ, १५ असार । सोलुखुम्बुमा आज बिहान जीप दुर्घटना हुँदा ६ जनाको मृत्यु भएको छ । नेचा सल्यानबाट पतलेबजार हाटमा जाँदै गरेको जीप बिहान करिब साढे ७ बजेतिर तिङ्लाको महादेव भिरमा दुर्घटना भएको प्रहरीले जनाएको छ ।

सहायक प्रमुख जिल्ला अधिकारी टुप्ती शेर्पाले दिएको जानकारी अनुसार दुर्घटनामा ६ जनाको मृत्यु भएको छ । उनका अनुसार शिवकुमारी यादवको मात्र पहिचान भएको छ । अन्य मृतकको पहिचान खुलेको छैन ।

एक जना ९ वर्षको बच्चालाई उद्धार गरेर उपचारको लागि सदरमुकाम ल्याइँदै छ । प्रहरी घटनास्थलमा नपुगिसकेकाले स्थानीयबासीले उद्धार जारी राखेको सहायक प्रमुख जिल्ला अधिकारी शेर्पाले बताए ।