९ महिनादेखि अन्तरिक्षमा फसेका २ जनालाई लिन गएको रकेट भोलि बिहान सबेरै पृथ्वीमा आइपुग्ने

नौ महिनाभन्दा धेरै समयदेखि अन्तर्राष्ट्रिय अन्तरिक्ष स्टेशन (आईएसएस) मा फसेका अन्तरिक्षयात्री सुनिता विलियम्स र ब्यारी विल्मोर भोलि बिहान सबैरै पृथ्वीमा आइपुग्ने भएका छन् ।

सुनिता र बुचलाई बोकेको स्पेसएक्स रकेट स्थानीय समयानुसार ५ बजेर ५ मिनेटमा स्टेशनबाट पृथ्वीका लागि अलग भएको बीबीसीले जनाएको छ । उनीहरूलाई पृथ्वीमा फर्किन १७ घण्टा लाग्ने र नेपाली समयानुसार भोलि बिहान पौने ४ बजेतिर अमेरिकाको फ्लोरिडाको तटमा अवतरण गर्ने खबरमा उल्लेख छ ।

यो रकेटमा अमेरिकी निक हेग र रुसी अन्तरिक्षयात्री अलेक्जान्डर गोर्बुनोभ पनि सामेल छन् । सुनिता र बुच आठ दिनका लागि भनेर अघिल्लो वर्षको जुन ५ मा स्पेस स्टेशन गएका थिए । उनीहरू बोइङ र नासाको संयुक्त ‘क्रू फ्लाइट टेस्ट मिसन’ मा गएका थिए । तर स्पेस क्राफ्टमा प्राविधिक त्रुटि आएपछि उनीहरू पछिल्लो नौ महिनादेखि अन्तरिक्षमै रोकिएका थिए ।

यसअघि उनीहरूको फिर्तीका लागि प्रक्षेपण गर्न खोजिएको फाल्कन–९ अन्तिम समयमा स्थगित गरिएको थियो । सुनिता र बुचसहित चार जना फर्किएसँगै उनीहरूको ठाउँमा यसअघि स्पेसएक्ससँगै गएका रुस र जापानका एक/एक तथा अमेरिकाका दुई गरी चार जना नयाँ अन्तरिक्षयात्री अन्तर्राष्ट्रिय अन्तरिक्ष स्टेशनमा छन् । उज्यालो