हिसिला जाममा फसेपछि मध्यरातमा बाबुरामको आक्रोश

8 years अगाडी Susma Dhakal

काठमाडौं, १७ भदौ । शनिबार साँझ नागढुंगा-नौबिसे सडक खण्ड घन्टौं अवरुद्ध भयो । बीच सडकमा केही सवारी साधन बिग्रिएपछि हजारौं यात्रुहरु अलपत्र परे । एम्बुलेन्स समेत घन्टौंसम्म जाममा परे । सँगसँगै जाममा फसे नयाँ शक्ति पार्टी, नेपालका कार्यालय सदस्यहरुसहित नेतृ हिसिला यमी ।

प्रदेश स्तरीय प्रशिक्षक प्रशिक्षण सकेर फर्किएकी नेतृ यमी लामो समय जाममा फसेपछि आक्रोशित बनेका नयाँ शक्तिका संयोजक तथा पूर्वप्रधानमन्त्री डा. बाबुराम भट्टराईले आक्रोशित हुँदै ट्वीट गरे । उनले शनिबार राति लेखे, ‘झण्डै ३ घन्टादेखि नागढुंगाबाट निकै तलसम्म भयंकर सडक जाम छ । हिसिला यमीसहित नयाँ शक्तिको हेडक्वार्टर टिमलगायत हजारौं यात्रु अलपत्र छन् ।’

जाममा अलपत्र पर्नेहरुको पीडा उल्लेख गर्दै उनले अगाडि लेखे, ‘बिरामी, बयोवृद्ध र बालबच्चाको के हाल होला ? विचरा लोकल ट्राफिक प्रहरी निरीह छ ।’ सरकारप्रति आक्रोश पोख्दै उनले अगाडि थपे, ‘एउटा वैकल्पिक बाटो अस्थायी भए पनि किन बन्दैन ? खालि रेल/पानी जहाजका सपना !’

Baburam Bhatt झण्डै ३ घन्टादेखि नागढुंगाबाट निकै तलसम्म भयंकर सडक जाम छ!हिसिला यमि सहित नयाँ शक्तिको हेडक्वार्टर टिम लगायत हजारौं यात्रु अलपत्र छन्!विरामी,वयोवृद्ध र वालवच्चाको के हाल होला!विचरा लोकल ट्राफिक प्रहरी निरीह छ!एउटा वैकल्पिक बाटो अस्थायी भए पनि किन बन्दैन?खालि रेल/पानी जहाजका सपना!

बाबुरामको ट्वीटमा सयौं सवाल जवाफ भएका छन् । कतिपयले आफू प्रधानमन्त्री हुँदा किन नबनाको र आफ्नो पार्टीका नेता र पत्नी जाममा पर्दा मात्र वैकल्पिक सडकको कुरा गर्ने ? भन्दै प्रश्न उठाएका छन् । कतिपयले सडक निर्माणमा बाबुरामले सक्दो काम गरेको कुरा नबिर्सन आग्रह गर्दै बाबुरामको बचाउ गरेका छन् । शनिबारदेखि सुरु भएको उक्त सडक खण्डको जाम अहिलेसम्म पनि खुल्न सकेको छैन । हजारौं यात्रुहरु बाटोमा अलपत्र परिरहेका छन् । देशकै राजधानी जोड्ने प्रमुख सडकको दुर्गति देखेर यात्रुहरु आक्रोशित बन्दै आइरहेका छन् ।