उपत्यकाका सवारीसाधनमा दैनिक करोडौँको ठगी, सरकार माैन

काठमाडाैं, २ असोज ।  काठमाडौँ उपत्यकामा चल्ने सार्वजनिक सवारीसाधनले दैनिक करोडाैं रकम ठग्ने गरेको पाइएको छ । उपत्यकामा दैनिक चल्ने माइक्रो तथा बसले यात्रुबाट करोडौँ ठग्दा पनि सरकार भने मौन रहेको छ ।सरकारले काठमाडौँ उपत्यकामा न्यूनतम १३ रुपैयाँदेखि अधिकतम २४ रुपैँयासम्म भाडा तोकेको छ । तर तोकिएको भाडादर कार्यान्वायन भएको छैन । ठगी गर्ने सवारीसाधनलाई कडा कारबाही हुने ट्राफिक प्रहरी प्रवक्ता राजकुमार लम्सालले बताए ।

उपत्यकामा दैनिक ७० हजार सार्वजनिक सवारी गुड्ने गर्छन् । जसबाट दैनिक ३ करोडभन्दा बढी रकम ठगी भइरहेको छ । सार्वजनिक सवारीसाधन मध्ये झन्डै ९० प्रतिशतले तोकिएको भाडादर टाँसेका छैनन् ।सरकारले तोकेको भाडादरअनुसार यात्रुले ४ किलोमिटरसम्मको १३ रुपैयाँ, ५ किलोमिटरको १५, ६ किलोमिटरसम्मको १६, ८ किलोमिटरसम्मको १७, १० किलोमिटरसम्मको १९ रुपैयाँ तिर्नुपर्छ । नेपाल यातायात व्यावसायी राष्ट्रिय महासङ्घका अनुसार काठमाडाैं उपत्यकामा ७० हजार सार्वजनिक सवारीसाधन गुड्ने गर्छन् ।