१० वर्षे बालिका बलात्कार गर्ने पुरुषलाई १६० वर्षको जेल

एजेन्सी, ७ असोज । अमेरिकाको एउटा अदालतले दश वर्षको बालिकालाई बलात्कार गर्ने एक पुरुषलाई १६० वर्षको जेल सजाय सुनाएको छ ।अमेरिकी अखबार वासिङ्टन पोस्टको अनुसार निकोलस डिओन नाम गरेका ती ३४ वर्षीय पुरुषले धेरैपटक पीडित दश वर्षिया बालिकालाई बलात्कार गरेका थिए । पीडित बालिका ती पुरुषकी प्रेमिकाकी छोरी हुन् । साथै अदालतले १३६ वर्षसम्म ती पुरुषलाई अस्थाई फुकुवा पनि नमिल्ने फैसला सुनाएको छ ।

उक्त मामिलामा अदालतले पूरै दुई वर्षसम्म सुनुवाई गरेको थियो । यसबीच पीडित बालिकाले एउटा बच्चालाई पनि जन्म दिएकी छिन् ।उक्त मामिलाको छानबिनमा ती पुरुषले बालिकामाथि दशभन्दा धेरैपटक बलात्कार गरेको पाइएको छ । पहिलोपटक बालिकामाथि बलात्कार गर्दा उनी मात्र आठ वर्षकी थिइन् । घटनापछि आफुलाई बचाउनका लागि ती पुरुषले उल्टै पीडित बालिकाकी आमामाथि जबरजस्ती बालिकाको शरीरमा आफ्नो शुक्रकिट राखिदिएको आरोप लगाएका थिए ।

उनले आफुले कहिले पनि बालिकासँग सम्बन्ध नबनाएको बताएका थिए ।ती बालिका आफ्नी आमासँग अल्टान्टामा बस्छिन् । उनी अहिले १२ वर्षकी भइन् । २०१७ मा उनले एउटा छोरोलाई जन्म दिएकी थिइन् । अहिले अदालतले पीडित बालिकाको आमाविरुद्ध पनि अपराध लुकाएको र अपराधमा साथ दिएको आरोपमा मुद्दा चलाइरहेको छ ।