अनिश्चितकालीन धनगढी बन्द आह्वान

धनगढी, १३ असोज । प्रदेश ७ को नाम सुदूरपश्चिम र राजधानी गोदावरीमा राख्ने निर्णयविरुद्ध धनगढी आन्दोलित भएको छ । शनिबारबाट धनगढी अनिश्चितकालका लागि बन्द आह्वान गरिएको हो । अनिश्चितकालीन बन्दको पहिलो दिन आंशिक प्रभाव परेको छ ।

बन्दकर्ताले बिहानैदेखि माइकिङ गरेर बन्द सफल पार्न आह्वान गरिरहेका छन् । बन्दकर्ताहरुले साँझ पाँच बजेपछि मात्र लामो दूरीका गाडीहरु चल्न दिइने बन्दकर्ताले जनाएका छन् । रात्रि बसहरुलाई जिल्ला भित्रन दिइए पनि लामो दुरीका बसहरु चलेका छैनन् । मोटरसाइकल चलाउन दिइएको बन्दमा रिक्सा र अटोहरु भने चलेका छैनन् ।

पूर्णरुपमा बन्द रहेको धनगढी बजारमा सुरक्षा व्यवस्था कडा बनाइएको छ । सशस्त्र र नेपाल प्रहरीका टोलीहरु चोकचोकमा परिचालित छन् शुक्रबार दुईतिहाई बहुमतको आधारमा प्रदेश सातको नाम सुदूरपश्चिम प्रदेश र राजधानी गोदावरी नगरपालिकाको वडा नं. २ मा राख्ने निर्णय भएको थियो । उक्त निर्णयको विरुद्ध प्रमुख प्रतिपक्षी दल नेपाली कांग्रेसले विरोध गर्दै आएको छ । मतदानमा राजपा र नेपाली कांग्रेस सहभागी थिएनन् ।