प्रेमविवाह गरेको ९ महिनामै एकअर्काप्रति यतिसम्म बढ्यो घृणा, दुवैले सँगसँगै गरे आत्महत्या

कलिलै उमेरमा प्रेम र त्यसपछि हतारमा सानैमा गरेको विवाहका कारण एक जोडीले ज्यान गुमाउनुपरेको छ । मात्रै १८ वर्षको उमेरमा एक जोडीले सँगसँगै झुण्डिएर आत्महत्या गरेका छन् । यो जाडैले मंगलबार राती फाँसी लगाएर आत्महत्या गरेका हुन् । झारखण्डको जमशेदपुरका १८ वर्षका संजय बेंब्रम र चाँदनी टुडूले आत्महत्या गरेका हुन् । यी दुईले नोभेम्बर २०१७ मा प्रेमविवाह गरेका थिए ।

चाँदनीले मर्नुभन्दा अगाडि तीन–चार लाइनको सुसाइड नोट छोडेकी छिन् । जसमा जिन्दगीसँग घृणा भएको उल्लेख छ । प्रहरीलाई छिमेकीले बताएअनुसार चाँदनी विवाहबाट खुसी थिइनन् । उनी भन्थिन् ‘हाम्रो विवाह परिवारको दबाबका कारण भयो । एउटै कोठामा भएर पनि हामीबीच पतिपत्नीजस्तो सम्बन्ध छैन । हामी यो सम्बन्धबाट सन्तुष्ट छैनौं ।’ छिमेकीहरुका अनुसार चाँदनी संजयसँग विवाहभन्दा अगाडि अर्का एक युवकसँग प्रेम गर्थिन् र तिनै युवकको घरमा बस्थिन् । प्रहरीले परिवारसँग सोध्दा परिवारले विवाह जबरजस्ती नभएको बताएका छन् ।

मृतक संजय चैनपुरस्थित आफ्ना मामाको घरमा बस्थे । संजयका मातापिता पनि चैनपुरमै बस्थे । संजयकी आमाका अनुसार मंगलबार यी दुवै चाँदनीको मामाको घर गएका थिए । दुवै साँझ ४ बजेतिर फर्केका थिए । साँझको खाना खाएर दुवै कोठामा गएका थिए । बिहान ७ बजेसम्म कोही नउठेपछि आमाले उनीहरुलाई बाहिरबाट बोलाएकी थिइन् । बोलाउँदा पनि कोही नबोलेपछि संजयका पिताले ढोकालाई जोडले धक्का दिए । ढोका फोरेर भित्र हेर्दा दुवैको व झुण्डिएको अवस्थामा थियो ।

प्रहरीले गरेको अनुसन्धान र बरामद सुसाइड नोटको अध्ययनबाट यो आत्महत्या नै भएको मानिएको छ । उनीहरुबीच बिहेपछि नै सम्बन्ध बिग्रिएको तर उनीहरुले बाहिर कसैलाई यसबारे नभनेको पाइएको छ । यी दुइबीचको सम्बन्ध निकै खराब भइसकेको प्रहरीले प्रारम्भिक जाँचबाट अनुमान गरेको छ । यद्यपि परिवारलाई भने यसबारे थाहा थिएन । परिवारले यी दुवै खुसी रहेको मान्दै आएका थिए ।