सरकार काँग्रेस द्वन्द्व : चिकित्सा शिक्षा विधेयकलाई लिएर भोलि संसदमा दुर्घटना हुन सक्ने

काठमाडौं – सरकारले संसदमा विचाराधीन राष्ट्रिय चिकित्सा शिक्षा विधेयकले डा. गोविन्द केसीका माग शत प्रतिशत पूरा गरेको भन्दै प्रक्रियाअनुसार पारित हुने बताएको छ । मन्त्रिपरिषद्का निर्णय सार्वजनिक गर्न आज आयोजित पत्रकार सम्मेलनमा सरकारका प्रवक्ता गोकुल बाँस्कोटाले अधिनायकवाद वा दुई तिहाईको दम्भ भने पनि संसदले विधेयक पारित गर्ने बताउनु भएको हो ।

दुई दिनको असफल प्रयासपछि भोलि बस्ने संसद बैठकमा विधेयक पेश गर्ने तयारी छ । विधेयकले गरेका व्यवस्था बुझ्दै नबुझी डा. केसी अनसन बसेको भन्दै प्रवक्ता बाँस्कोटाले प्रक्रियामा रहेको विधेयक प्रक्रियाअनुसार नै पारित हुने बताउनु भयो ।

उता, प्रमुख प्रतिपक्ष दल नेपाली कांग्रेसले डा. केसीसँगको सहमति विपरित ल्याइएको विधेयक पेश गर्न नै नदिने निर्णय गरेको छ । पार्टी मुख्यालय सानेपामा आज बसेको केन्द्रीय समिति बैठकले अनशनरत डा. केसीको माग पूरा गर्न सरकारको ध्यानाकर्षण गराउँदै बहुमतको बलमा विधेयक पारित गर्न खोजिए संसदीय प्रक्रिया अगाडि बढ्न नदिने चेतावनी दिएको छ ।

प्रतिनिधिसभाको सोमबार र मंगलबार बसेको बैठकमा विधेयक पेश गर्ने कार्यसूची थियो । तर, आफ्ना नेताका नाममा खोलिएका अस्पताल सरकारले खारेज गर्न खोजेको भन्दै कांग्रेसले सदन अबरुद्ध गरेपछि विधेयक पेश हुन सकेको थिएन ।

सत्तारुढ दलका नेताले तत्कालिन सभामुख रामचन्द्र पौडेलले स्थापित गरेको नजीरअनुसार मन्त्रीलाई रोष्टम जान नदिए यथास्थानबाट पेश गरेर भएपनि विधेयक पारित गराउने बताउँदै आएका छन् । तर, सभामुख कृष्णबहादुर महराले आज सञ्चारकर्मीसँग कुरा गर्दै भोलि विधि सम्मत् ढंगले नै विधेयक पारित गराउने प्रयास हुने जानकारी दिनुभयो ।