टी-ट्वान्टी अन्तर्राष्ट्रिय सिरिज: आज नेपालले यूएईसँग खेल्दै

काठमाडौं, १७ माघ । नेपाली राष्ट्रिय क्रिकेट टोलीले आज संयुक्त अरब इमिरेट्स (युएई) सँग पहिलो टी-२० अन्तराष्ट्रिय खेल खेल्दैछ ।नेपाल र युएईबीचको खेल दुबईस्थित आईसीसी ग्लोबल क्रिकेट एकेडेमीको मैदानमा नेपाली समय अनुसार दिउँसो २ः४५ बजे सुरु हुनेछ ।

एकदिवसीय र टी-२० सिरिजका लागि युएई भ्रमणमा रहेको नेपालले पहिलो टी ट्वान्टी खेल्न लागेको हो । नेपाल टी-२० सिरिज समेत जित्ने लक्षमा रहेको छ । घरेलु टोलीविरुद्धको एकदिवसीय सिरिज जितेको नेपाल अर्को जितको खोजीमा रहेको छ । नेपालले सोमबार युएईलाई ४ विकेटले हराएर ३ खेलको एकदिवसीय क्रिकेट सिरिज २१ ले जित्दै पहिलो एकदिवसीय अन्तराष्ट्रिय सिरिज हात पारेको थियो ।