झापाली समाज युएईका पुर्वअध्यक्ष भण्डारीको बिदाई ।

आरपी सहयात्री

अप्रिल १८,युएई- झापाली समाज युएईले आफ्ना पुर्वअध्यक्ष रोहितकुमार भण्डारीलाई युएईबाट भव्य तरिकाले बिदाई गरेको छ । नेपाली नववर्स २०७६ को अवसरमा गत १२ अप्रिल शुक्रबार झापाली समाज युएईले आयोजना गरेको शुभकामना आदानप्रदान तथा सांगीतिक कार्यक्रममा भण्डारीलाई बिदाई गरिएको हो ।

वैदेशिक रोजगारीको सिलसिलामा सन् २०११ देखि युएईमा सपरिवार रहेका भण्डारी युएईको एक प्रतिष्ठित यतिम ग्रुप अफ कम्पनीको आन्तरिक लेखापरीक्षक हुँदै पछिल्ला तीन वर्षदेखि फाइनान्स रिपोर्टरका रुपमा काम गरेका थिए । लन्डनको एसोसिएसन अफ चार्टर्ड सर्टिफाइड एकाउन्टेन्टस र अक्स्फोड ब्रूक्स विश्वविद्यालयबाट सिएको अध्ययन पूरा गरेका भण्डारीले लन्डनकै विभिन्न युनिभर्सिटीहरुमा अध्यापन गरेको अनुभव संगाालेका छन् ।

भण्डारी युएईको नेपाली समुदायमा अध्ययनशिल, दुरदर्शी, परोपकारी र सामाजिक ब्याक्तित्वका रुपमा परिचित छन् । अन्तर्मुखी स्वभावका भण्डारी युएईको नेपाली सामाजिक गतिविधिमा होहल्ला गरेर नाम कमाउनेभन्दा परिणाममुखी काम गरी शान्त रहने थोरै ब्यक्तिमा पर्छन् । नेपालको अर्थतन्त्रसम्बन्धि गहिरो रुचि राख्ने प्राज्ञिक ब्याक्तित्व भण्डारी युएईको नेपाली समुदायमा विध्यमान चन्दा संकलनमुखी समाजसेवाको विकल्प खोज्नुपर्छ भन्ने मान्यता राख्छन् ।
तत्कालीन समयमा दुई चिरामा विभाजित झापाली समाज युएईलाई एकताबद्द गराउन आफ्नो पदको परवाह नगर्ने भण्डारीलाई समाज एकताका सुत्रधार मानिन्छ । सन् २०१६ मा अलएनमा भएको झापाली समाज युएईको प्रथम अधिवेशनबाट सर्वसम्मत चयन भएका भण्डारी थोरै समय नेतृत्वमा रहे पनि समाजको एकता, सहयोग र सहकार्यको मुलमन्त्रलाई अक्षरस पालना गर्न पुर्ण रूपमा सफल रहेको झापाली समाज युएईका वर्तमान अध्यक्ष अशोक चापागाईंले बताएका छन् ।

करिब ८ वर्षको वैदेशिक रोजगारीपछि नेपालको कृषि र पर्यटन क्षेत्रमा समर्पित हुने लक्ष्य लिएर भण्डारी यही २५ अप्रिल स्वदेश फर्कदै छन् । उनै भण्डारीको अग्रसरतामा झापाको गौरादहमा करिब २ करोडको लगानीमा केही महिना अगाडि मात्रै प्रवासी झापाली एग्रो फार्म (पिजेएएफ) संचालनमा आइसकेको छ । झापाली समाज युएईका ३४ जना आजिवन सदस्यको लगानी रहेको उक्त फार्मले चार बिगाहा जग्गामा उन्नत जातका बोयर बाख्रा, लोकल कुखुरा, गाईपालन शुरु गरिसकेको छ । कृषि र पशुपालन हुँदै लाईभ रेस्टुरेन्ट, कृषि पर्यटन र कृषि विश्वविधालय स्थापना गर्ने सपना बोकेर भण्डारी नेपाल फर्कन लागेको जानकारी उनले दिएका छन् ।