प्यूठानमा नेपाली काँग्रेसको ‘ राष्ट्रिय जागरण अभियान’ सुरू

प्यूठान – प्रमुख प्रतिपक्षी दल नेपाली काङ्ग्रेसले प्यूठानमा राष्ट्रिय जागरण अभियान सुरू गरेको छ । मुलुकभर एकसाथ ‘हिमाल, पहाड, तराई मधेश नेपाली काङ्ग्रेस राष्ट्रिय जागरण अभियान’ अन्तर्गत हिजो प्यूठानको बरौलामा नेपाली काँग्रेसका केन्द्रिय सदस्य डा . गोविन्द राज पोख्रेले कार्यक्रमको उद्घाटन गरेका हुन् ।

अभियानको सुरुवात गर्दै केन्द्रिय सदस्य पोख्रेलले पार्टीको महासमिति बैठकबाट पारित नीति, कार्यक्रम र संशोधित विधानबारे पार्टीको स्थानीय तहसम्म सुसूचित गर्ने, पार्टीमा एकता तथा सुदृढीकरणका गतिविधि अघि बढाउने, काँग्रेसको नेतृत्वमा मुलुकले हाँसिल गरेका राजनैतिक उपलब्धि एवं समृद्धिको सम्प्रेषण गर्ने उद्देश्य रहेको बताए । देशका सबै जिल्ला, क्षेत्र, गाउँ/नगर, वडा र टोलसम्म विस्तारित हुने जागरण अभियान २०७६ सालभर तीन चरणमा सम्पन्न हुने उनले बताए ।

अभियानमा ऐरावती गाउँ पालिका अध्यक्ष नबिल बिक्रम शाह , वडा अध्यक्ष चन्द्र रोका , केन्द्रिय प्रतिनिधीहरु , नेपाली काङ्ग्रेसमा आस्तवान राख्ने गाउँवासी हरुको उपस्थित रहेको थियो ।

पहिलो चरणको कार्यक्रम जिल्ला केन्द्रीत, दोस्रो चरण प्रदेश निर्वाचन क्षेत्र र तेस्रो चरणको अभियान स्थानीय तह केन्द्रीत हुनेछ । जसका लागि जिल्लामा खटाइएका केन्द्रीय प्रतिनिधिलाई एक महिना जिल्लामै बस्न पार्टीले निर्देशन दिएको छ । अभियान सफल बनाउन काँग्रेसले सबै भातृसंगठनलाई परिचालन पनि गरेको छ । दोस्रो चरण भदौ २४ गते बीपी जयन्तीको दिनदेखि असोज ७ सम्म र तेस्रो पुस ७ देखि पुस १६ गते मेलमिलाप दिवससम्मका जागरण अभियानको कार्यसचूी सार्वजनिक गरेको छ ।

पहिलो चरणअन्तर्गत ७७ जिल्ला, दोस्रो चरणमा ३ सय ३० प्रदेश निर्वाचन क्षेत्र र तेस्रो चरणमा ७ सय ५३ स्थानीय तहमा जागरण अभियान सञ्चालन हुनेछ ।पार्टीका शीर्ष नेताले सात वटै प्रदेशबाट अभियानको आरम्भ गर्ने काँग्रेसले जनाएको छ ।