फिल्म उद्योगभन्दा बाहिरबाट आउनु नै मेरो सबल पक्ष हाे: तापसी पन्नु

बलिउड अभिनेत्री तापसी पन्नुले दक्षिण भारतीय फिल्मबाट आफ्नो करियरको सुरुवात गरेर सफलता हासिल गर्दै छुट्टै पहिचान बनाइसकेकी छिन् । तापसी आफू फिल्म उद्योगमा आउटसाइडर हुनुलाई आफ्नो ताकत मान्छिन् । मिडियासँगको कुराकानीका क्रममा बलिउडमा बाहीरबाट आउनेहरुलाई ‘आउटसाइडर’ जस्ता ट्याग दिइन्छ, यस्ता कुरासँग उनी कसरी डिल गर्छिन भन्ने प्रश्नमा तापसीले भनिन्, ‘हो म एक आउटसाइडर हुँ । म फिल्मी जगतका नामी हस्तीहरुबीच चर्चित छैन । जब म कुनै फिल्मको छायांकन गरिरहेकी हुँदिन, तब म घुमिरहेकी हुन्छु । साथै फिल्मी दुनियाभन्दा बाहिर एक सामान्य व्यक्तिको जीवनलाई नजिकबाट नियालेर बुझ्ने कोशिश गरिरहेकी हुन्छु ।’

उनले अगाडि भनिन्, ‘म फिल्म इण्डष्ट्रिभन्दा बाहिरबाट आउनु नै मेरो ताकत हो जस्ताे लाग्छ। यसैकारण म सामान्य जिन्दगी बाँच्दै अभिनयमार्फत कैयौं वास्तविक कुरालाई देखाउन सक्छु । यससँगै म राति छिट्टै सुत्छु र बिहान छिट्टै ब्युँझन्छु । त्यसैले भएर आधारातसम्म पार्टी गर्नु मेरो जीवनशैलीसँग मिल्दैन । वास्तवमै म मेरो संसारमा खुशी छु ।’ गएकाे वर्ष तापसी अभिनित ‘मुल्क, मनमर्जियाँ, र दक्षिण भारतीय फिल्म लगायत ४ वटा फिल्महरु रिलिज भएका थिए । यस वर्ष उनी अभिनित ‘गेम ओभर, मिशन मंगल, साँड की आँख जस्ता फिल्म रिलिज हुनेछन् । तपाइँले प्राप्त गरेको सफलतालाई कसरी लिनुहुन्छ? भन्ने प्रश्नमा उनले भनिन्, ‘मैले मेरो बकेट लिष्टमा ३० वर्षको उमेरभित्रमा आफ्नै कार, आफ्नो छुट्टै अपार्टमेन्ट र स्थिर करियर होस भन्ने राखेकी थिएँ र म धन्य छु, मैले ती सबै कुरा पुरा गर्न सफल भएँ ।’

तापसी पन्नु अभिनित यस वर्ष रिलिज भएको फिल्म ‘बदला’ ले बक्स अफिलमा राम्रो प्रदर्शन गरेको थियो । तर पनि यस फिल्मबारे सामाजिक सञ्जालमा खासै चर्चा भएन । साथै बलिउड फिल्म जगतका कलाकारहरुले पनि कुनै प्रतिक्रिया जनाएनन् ।यस्ता कुराले कत्तिको असर पार्छ? भन्ने प्रश्नमा तापसीले भनिन्, ‘ती त्यस्ता व्यक्ति होइनन् जसलाई मेरा फिल्मले बक्स अफिसमा राम्रो पैसा कमाउँदा फाइदा मिल्नेछ । यदि कुनै फिल्म हप्तौंदेखि सिनेमा हलमा चलिरहेको छ भने त्यसको मतलब दर्शकहरु त्यो फिल्म हेरिरहेका छन् भन्ने नै हाे । तसर्थ म कसैसँग किन गुनासो गरौं ? साथै उनले आफू बलिउडका खानहरुसँग काम गर्न उत्सुक रहेको बताएकी छिन् ।