कागजमा सहमति भयो तर मनमुटाव उस्तै, शिल्पाले लिइन् कडा निर्णय

काठमाडौं। चलचित्र निर्माता छविराज ओझा र उनकी पत्नी शिल्पा पोखरेलबीच कागजमा सहमति भएको छ । तर, कागजी सहमति भए पनि उनीहरुबीचको मनमुटाव भने उस्तै छ । पछिल्लो घटनाक्रमले अब उनीहरुबीच पहिलेको सम्बन्ध फेरि हुन कठिन देखिएको छ ।

शिल्पाको उजुरीपछि छविले अबका दिनमा पत्नी एवं अभिनेत्री शिल्पा पोखरेललाई गाली गजौल तथा हातपात नगर्ने भनेर सम्झौतापत्रमा हस्ताक्षर गरेका थिए । प्रहरीको रोहवरमा भएको छलफलमा आफ्नै पत्नी शिल्पासँग विगतमा भएको झगडाको बारेमा पति छविराजले माफी मागे । छविराजले माफी माग्दै अबका दिनमा कुनै झैझगडा तथा हातपात नगर्ने भनेर पत्नीसँग मिलापत्र गरेपछि पछि उनीहरूको विवाद टुंगिएको हो ।

तर, अभिनेत्री शिल्पाले आफ्नो ज्यानको सुरक्षालाई ध्यानमा राख्दै तत्काल घर नफर्किने बताएको राजधानी दैनिकले दावी गरेको छ । ‘मेरो ज्यानको सुरक्षा अहिले पनि नभएका कारण म अहिले नै घर फर्किन्नँ । वकिलसँग सल्लाह गरेर अब के गर्ने र कसरी म सुरक्षित हुने भन्ने ग्यारेन्टी गरेर मात्र अगाडीको कदम चाल्नेछु’ शिल्पाको भनाइ द्धिृत गर्दै राजधानीले लेखेको छ ।