लमजुङमा घरेलु तथा साना उद्योगको संख्या बढ्दो, ४ अर्ब लगानी

लमजुङ – लमजुङमा घरेलु तथा साना उद्योगमा उद्यमीहरुको आकर्षण बढ्दै गएको छ । परम्परागत कृषि तथा उद्यमलाई व्यावसायिक बनाउनतर्फ यहाँका उद्यमीहरु अग्रसर भएका हुन् ।
जिल्लामा हालसम्म घरेलु तथा साना उद्योगहरुको संख्या ४ हजार ७ सय ४८ पुगेको घरेलु तथा साना उद्योग विकास समिति, लमजुङका प्रमुख तोपलाल भुषालले जानकारी दिनुभयो । उहाँका अनुसार आर्थिक वर्ष २०७७/७८ मा यहाँ ९ सय ६९ वटा घरेलु तथा साना उद्योग दर्ता भएका छन् । यस्तै, त्यही आर्थिक वर्षमा २६ वटा घरेलु उद्योग र ४४ वटा वाणिज्यतर्फका उद्योग खारेज भएका छन् ।
कार्यालयमा दर्ता भएका उद्योगहरुमा कृषि फर्म, सिलाइ–कटाइ, कुटानी–पिसानी, कृषि औजार, बेकरी उद्योग, मौरीपालन लगायतका उद्योग रहेका उहाँले बताउनुभयो । विशेषगरी बेसीशहर, सुन्दरबजार, भोटेओडार, भोर्लेटार र खुदी लगायतका लमजुङका मुख्य व्यापारिक तथा बजारी क्षेत्रमा व्यवसाय तथा पसलहरु सञ्चालनमा आएको कार्यालयको तथ्यांकमा उल्लेख छ ।
जिल्लामा बर्सेनि घरेलु तथा साना उद्योगको संख्या बढेसँगै लगानी पनि थपिँदै गएको छ । हालसम्म जिल्लाका विभिन्न उद्योगमा झण्डै चार अर्ब हाराहारीमा लगानी भएको घरेलु तथा साना उद्योग कार्यालय, लमजुङले जनाएको छ ।  उज्यालो