रिगल’ काे कैद मिनाहाविरुद्ध अनशन शुरु गर्नुभएकी भारती अस्पताल भर्ना

काठमाण्डाै – श्रीमान् चेतन मानन्धरको हत्या गर्ने योगराज ढकाल (रिगल) लाई सरकारले दिएको कैद मिनाहाविरुद्ध अनशन शुरु गर्नुभएकी भारती मानन्धर अस्पताल भर्ना हुनुभएकाे छ । उहाँकाे अहिले वीर अस्पतालमा उपचार भइरहेको छ ।

भारती आज बुधवार सर्वोच्च अदालत परिसरमा बेहाेस भएर ढलेपछि उहाँलाई उपचारका लागि वीर अस्पताल लगिएको हाे । आममाफीविरुद्ध उहाँले दायर गर्नुभएको रिटको सर्वोच्चमा आज पहिलो पेसी थियो । तारिख लिएर फर्किने क्रममा उहाँ बेहाेस हुनुभएकाे हाे ।

न्यायका लागि नेपालगञ्जबाट काठमाण्डाै आएकी भारतीले माइतीघरमा आजदेखि रिले अनशन शुरु गर्नुभएकाे छ । अनशन शुरु गर्ने क्रममा उहाँले न्याय नपाएसम्म सङ्घर्ष कायम राख्ने बताउनुभएको थियो ।

रिगलविरुद्ध २०७२ असार २८ गते नेपालगञ्जको धम्बोजी चोकमा चेतनमाथि खुँडा प्रहार गरी हत्या गरेको अभियोग थियो । उनलाई जिल्ला अदालत बाँकेका तत्कालीन न्यायाधीश विष्णु सुवेदीको इजलासले २०७६ वैशाखमा दोषी ठहर गर्दै सर्वस्वसहित जन्मकैदको सजाय सुनाएको थियो । तर संविधान दिवसको अवसरमा सरकारको सिफारिसमा राष्ट्रपतिले कैद मिनाहा गरेपछि रिगल छुटेका थिए । उज्यालो